Shillong, Naiwieng 17: Ka Samla Angel Supuh, ka Samla Khasi Pnar ba shong ba sah ha Bangladesh, ka la pynpaw nam ïa la ka jong ka jaidbynriew ha Bangladesh, ha kaba ka la kiew sha ka kyrdan kaba heh bha ha ka Echo Bangladesh.
Ka Echo Bangladesh, kadei ka kynhun kaba la trei borbah na ka bynta ban ai jingnang jingstad bad kyntiew ïa ka pule puthi jong ki khynnah baduk ha Bangladesh, khamtam ki khynnah kiba dei na ki kynhun rit paid ha katei ka ri.
Katkum ka jingpyllait khubor ha ki Social Media, kane ka Samla Pnar, ka la kiew na ka kyrdan Operation Managing Director sha ka Managing Director jong ka Echo Bangladesh.
Kane ka jingpyllait khubor na ka Echo Bangladesh, ka ong ba ka Samla Angel ka la trei ha kane ka kam mynta la hynriew snem bad ha kine ki hynriew snem, i la ïalam bad peit kum i Supervisor ïa baroh ki nongtrei jong kane ka Kynhun. “Ka jingdon jong i bad ka jinglah treikam jong i, ka la ïarap shibun ïa ki khynnah kiba duna na ka bynta ban ai ha ki ïa ka jingpule bad ka jingnang jingstad”, la ong ka kyrwoh na ka Echo Bangladesh.
Ka jingtreikam jong i ka long khamtam ha ki bynta jong ka Sylhet bad Mulvi Bazar bad dei ka jinglah treikam jong i ba kane ka kynhun ka la kyntiew ïa i sha kane ka kyrdan.
Ka Echo Bangladesh ka pynpaw ka jingsngewkmen ba don ka Samla kum ka Angel ban trei na ka bynta ki Khynnah baduk.
