Ka pisa na ka FOCUS kam dei ka ram, lada don ba kular 5,000 wat tare ruma: Bah Banteidor

0

Shillong, Naiwieng, 17: U Myntri jong ka tnad ka rep ka riang u Bah Banteidor Lyngdoh u la ong ba ka FOCUS kam dei ka ram hynrei kadei ka kynja grant ba ka sorkar ka la wanrah na bynta ban ai sha ki nongrep bad sha ki Producer Group kiba ym duna ïa ka shiphew haduh arphew ngut, hynrei ki paidbah kim dei ban shu tare ruma lada don kiba kular da ka 5,000 ne 10,000 tyngka.
U Bah Banteidor u la pynhai sha ki paidbah hadien ba u President ka BJP Meghalaya Unit u Bah Ernest Mawrie u la ong ba lada ki paidbah ki shim ïa ka 5,000 tyngka ba ai ka NPP kin hap ban siew ram sha ka bank hadien ba la kut ka ilekshon. “Kaei kaba u President ka BJP u ong kadei lehse ba ki paidbah ki shah kular da ka pisa, hynrei nga hi ngam don ba ong eiei da kumwei hynrei ka FOCUS hi kadei ba skhim ba la pyllait paidbah da ka sorkar Jylla ban sam sha ki nongrep bad ki Producer Group kiba ym duna ïa ka shiphew haduh arphew ngut,” ong u Bah Banteidor.
U la ong ruh ba kane ka skhim ka long kum ka grant ban ai sha ki nongrep. “Ka FOCUS kadei kum ka kynja grant ba la ai sha ki nongrep ki jong ngi la kidei kiba ri jingri, kiba rep soh rep pai bad rep jhur kaba treikam sha ki thaiñ nongkyndong bad ha ka jylla hi baroh kawei. Kadei ruh na bynta ban ïarap ïa ka kamai kajih jong ki na kata ka daw ngi sa wanrah ïa kane ka skhim bad haduh mynta ngi dang ïai kyntu ïa ki paidbah ba lada kim sngewthuh kin leit sha ki block ban kylli khnang ba kin batai ïa ki shaphang kane ka skhim. Hynrei ka jingkren u Bah Ernest kadei ïoh lehse kidon kiba shah tyrwa pisa ban ai ram,” la ong u Bah Banteidor Lyngdoh da kaba kren shai ruh ba ka FOCUS hi kadei kaba ka sorkar MDA ka la wanrah khnang na ka bynta ban kyntiew ïa ka ïoh ka kot jong ki paidbah.
U la pynkynmaw ruh da kaba ong ba ki paidbah ka jylla ha ki snem ba la dep ki la ngat a kiba kum kine ki jingjia ba ki hap ban siew ram sha ki bank namar ba ki paidbah ki tare ruma khlem da wad jingtip kiba thikna. “Ka FOCUS hi ka long shai ba kadei ka grant hynrei kata ka jingtyrwa bad kular ban ai san hajar ne shipew hajar kadei kaba ma shibun ïoh ka don ruh kaba kum kata namar kiba bun ki paidbah hapoh ka jylla ha ki snem ba la dep ki la ngat ha kaba kum kine ki jingjia ba ki la hap ban siew ïa ka ram ha ryngkat ka sut. Kumta ban lait na kita kiei kiei ki paidbah kidei ban leit kylli sha ki bor ha balor kiba peit bad khmih ïa kane ka skhim khnang ba kin pynshai,” u la ong.
“Nga ïalade nga la pynsngewthuh bad ki paidbah ruh ki la sngewthuh lyngba ki volunteer ba ngi la buh bad tang kine kiba lah ban shim ïa ki kot ki sla jong ki namar ym lah ban shu ïashim pathar da mano re mano namar ka long kaba ma bad dei halor kane ba u Bah Mawrie u kwah ban pynshai namar u tieng ïoh ki briew kin ngat ha ka apot bad ka jingeh ïoh dei ka ram. Ka FOCUS ka long shai bad nga la pyllait lang ryngkat u Myntri Rangbah na ka bynta ban ïarap ïa ki nongrep ki jong ngi kaban long kum ka grant hynrei ïa kiwei kiwei pat ki skhim nga te ngam da tip.”
“Nga kwah ruh ban ong ïa ki paidbah ba lada don kiwei kiwei pat ki skhim kim dei ban shu leh klumar hynrei banda wad shuwa ïa ka jingshai bad da phi lah ïoh ka jingshai bad da lah sngewthuh bha sa ïaid shakhmat bad wat tare ruma namar kiba bun kiba kum kine ki la jia namar ka pyrthei mynta ka long kaba ïa kop haduh katta katta ïoh ngat ha kine ki jingeh kan long ka jingduh nong, kan long ka jingïam briew bad paid dohnud,” ong u Myntri.
U Bah Banteidor Lyngdoh u la kyntu ruh ïa kiwei pat ki nongïalam ba kim dei ban pynlong ïa ka skhim FOCUS kum ka rynsan ïalap ilekshon lane ban pynmyntoi ïano ïano ne ïa kano kano ka seng saiñ pyrthei. “Ka FOCUS kadei ka skhim jong ka sorkar MDA bad ba la wanrah lang ruh da baroh kiba don ha ka, ym dei ban pynlong ïa ka kum ka rynsan ïalap ilekshon ban pynmyntoi ïano ïano ne ïa kano kano ka party namar kane kadei ka skhim jong u paidbah,” ong u Bah Banteidor Lyngdoh.

Leave A Reply

Your email address will not be published.