Shillong,Iaiong 20 : Ka Myntri jongka tnad ka koit ka khiah I Dr Ampareen Lyngdoh mynta ka Sngi Pale i la pan ïa ka kaiphod na ki bor ba dei peit ïa ka tnad halor ki jaka sumar kiba khlem treikam ha baroh kawei ka jylla.
ïa kane i la leh hadien ba la dep ïa kynduh ïa ki nongïalam ka Hynniewtrep Integreated Territorial Organisation (HITO) Ri Bhoi District bad ka Dorbar Shnong Parila halor ka jingdawa jongki ban pyntreikam noh ïa ka MCH Hospital ha katei ka shnong da kaba thung briew shuh shuh khnang ba kan lah ban shakri hok ïa ki briew katei ka thaiñ.
Haba iakren bad ki nongthoh khubor i la ïathuh ba in sa leit jurip ïa katei ka jaka sumar ha Parila ha ka 8 tarik Jymmang. Yn ïadon lang u MLA ka Umsning u Dr Celestine Lyngdoh, u MLA ka Nongpoh u bah Mayralborn Syiem uba dei ruh u Adivser jongka tnad ka koit ka khiah ha katei ka sngi.
“ Nga kyrmen skhem ba ngan lah ban pynurlong ïa kane ka jingthrang ki paidbah ïa kane ka jaka kaba la pyndonkam kum ka COVID Centre bad kumjuh ruh ka Quarantine Centre. Ngin leit ban jngoh da la ki jong ki khmat bad ha kajuh ka por nga ruh ngan dang pyndep ïa kiei ki kam ba nga dei ban pyndep” ong ka myntri
Ka don ka jingeh bad ki nongtrei bad “ Ngam tip la ki don ne em ki post ba la pynkhreh ha katei ka MCH Hospital lane la dep pynlong interview ne em ngi hap ban bishar bniah shwa hynrei namar ba ka don ka NHM nga thikna ba ngin lah ban pynïaid noh shakhmat ïa ka kam bad ïa kane baroh ngan sa tip bha ynda nga la ïoh jubab halor kane ka MCH hospital.
La ïathuh ruh ba in sa phah ïa ka kynhun ka ban leit jurip kylleng ka jylla bad ban ai ïa ka kaiphod ïa ki jaka sumar ki bym treikam.” Ngan ïoh pdiang ïa kaiphod ha u Jymmang bad hadien kata ngin sa thaw lad kumno ngin pynbeit ïa kane ka kam. Hooid ka long ka kam kaba eh namar nga hap ban leit sha kylleng ka jylla hynrei ngan pyrshang ban ai ka jingshakri kaba pynhun ïa ki paidbah bad ngin sdang shwa na ka Parila bad ngin sa peit sa shano ngin leit biang. Namar nga kwah ban ïohi haba la dep tei la dep shna dei ban pyntreikam ïa ki.
I la pynthikna ruh ba in ym ailad ba ka lyer saiñ pyrthei kan rung ha kane ka tnad namar ha kaba kut hi ka jingkoit jingkhiah ka long kaba donkam ïa baroh bad kumta ïa ki jingdonkam dei ban pynbiang lut ïa baroh bad na kata ka daw im kwah ba ka lyer saiñ pyrthei kan ïoh ban pynjakhlia ha kane ka tnad.
