Shillong, Iaiong 20 : U Symbud Myntri Rangbah ka jylla u Ma Sniawbhalang Dhar uba long ruh u Myntri Kam Pynroi Sor, ula pyntip ba ka sorkar jylla kan sa khot aplikeshon biang na ka bynta ban ïoh ïa ka jaka bret ïa ki jakhlia jong ka nongbah Jowai.
“Ha ki khyndiat bnai kiba la dep, ngi la khot ïa ka Expression of Interest (EOI) ha kaba ki la don kiba la tyrwa ïa ki jaka ki jong ki hynrei kitei ki jaka kim long kiba biang, kumta ngi hap ban khot biang ïa ka EOI kaba thymmai na ka bynta kito kiba don iaka jingthmu ban ai jaka ïa ka sorkar” ong u Ma Sniawbhalang haba ïakren bad ki nongthoh khubor ha ka sngi Balang
Ula pynshai ba ka sorkar ka la dep ban pynkhreh nadong shadong haba ïadei bad ki jaka ba la phah applikeshon hynrei ha ba leit jurip ïa ki jaka la shem ba kitei ki jaka kim long kiba bit ba biang.
U Myntri Sorkar um shym la treh pat ban ïathuh eiei halor ka jaka kaba pyndonkam mynta ha ka ban theh ïa ki ñiut ba la lum na sor Jowai bad ula ong ba ka dei ka kamram ka jongu kum u nongïalam bad kum u Myntri Pynroi Sor ban peit ïa kane ka bynta bad ki dang ïaid shakhmat ban ïoh ïa ka jaka ban lum ñuit bad u sngewthuh shai ba ka long kaba kam kaba eh bad kam dei satia kaba suk.
Ha kaba ïadei bad ka jaka lum ñiut kaba thymmai ha nongbah Shillong, u Ma Sniawbhalang ula ong ba ki kam ki jam mynta ki la ïaid kumba 80% bad kaba sah ka long sa tang ban pynlong ïa ka Public Hearing ne ka jingpynsngew paidbah. U pyntip ba un sa lum ïa ka jingïalang halor kane ka kam ha ka taiew ban wan.
Haba pynpaw ba ka Marten ka dang lah ban treikam sa 3 ne 4 snem, une u Myntri Sorkar ula ong “Hynrei ka sorkar kan ym ap haduh ban da kut noh katei ka por…. kumta kala shim ïa ki sienjam ban wad jaka shawei namar kan kham bha shibun lada pynkhreh lypa ïa ka kam”.
Haba kylli ba ki paidbah ki long artatien ban ai jaka ban pynlong jaka theh ñiut namar ki la sakhi ïa kaei kaba jia ha Marten, u Myntri Sorkar ula ong, “Ki paidbah ki dei ban ai ïa ka jaka namar ïa kum kane ka jait kam donkam ban shim lang ïa ka jingkitkhlieh na ka bynta ka jingbha jong ka jylla, namar lada mih ki jingpyrshah kiba kumne kumtai, ki ban mad ïa ka jingeh dei Ma nga bad ma phi hi. Kumta nga kyntu ïa baroh kiba don bynta ba kin don ryngkat lang bad ngi lem kumta shaei ngin leit ban bret ïa ki ñiut”.
