Shillong, Iaiong 20: Ka Myntri ka tnat ka koit ka khiah I Dr. Ampareen Lyngdoh iba dei ruh ka nongaiktien ka sorkar Meghalaya Democratic Alliance (MDA) ka la kular ba shen ka sorkar kan sa shim ïa ka sienjam ban iaid da ka lynti kaba biang tam bad pynhun lang ïa baroh ha kaba ïadei bad ka Roster System.
Haba kren sha ki lad pathai khubor ka Dr. Ampareen ka la ong “Ka sorkar kan sa shim daka sienjam kaba bha tam bad ka sorkar kan pynthikna ba ka sienjam kan dei katkum ki jingtip ba paka bad kaba biang”.
Ka Dr. Ampareen kala kyntu ïaki paidbah jong ka jylla bad kumjuh ruh ïa kiwei ki sengsaiñ pyrthei ban ailad ïa ka sorkar ban lum ïa ki jingtip ba donkam naka bynta ban pyntreikam ïa ka Roster System khnang ba kane ka jingpyntreikam kan long kaba beit bad kaba biang bad ka bym leh shilliang ïa kano kano ka jaidbynriew lane ïa ki paidbah ka jylla.
Ka la kyntu ruh ïa kiwei ki sengsaiñ pyrthei ban ai ki jingai jingmut bad ka la kular ruh ba ka sorkar kan shim lut ïa ki jingai jingmut jong baroh hashuwa ban shim ïa ka rai kumno ban ïaid shakhmat ha kaba ïadei bad ka Roster System.
Ka Dr. Ampareen kala kyntu ruh ïa ki paidbah ka jylla ba kim dei ban shah ïalam bakla ha kino kino ha kaba ïadei bad ka jingïaid lynti bad ka jingpyntreikam ïa ka bhah thungkam lane ka Reservation Policy.
Ka la ong ba ka sorkar ka don jingtip ba kane ka jingdawa sangeh pyntreikam ïaka Roster System ka lah ban wanrah ka jingïapher jaidbynriew hapoh ka jylla bad kala kyntu ïa ki paidbah ba ki dei ban shaniah haka sorkar ban shim ïa ki sienjam kiba bha tam.
“Nga kwah ban kular sha ki paidbah ka jylla ba ka sorkar ka shim khia bad ka leh ïa ka ba donkam haba ïadei bad kane, ka sorkar ka la bud ruh ïa ki katto katne ki hukum ka ïing kashari kumno ban pyntreikam ïa ka Reservation Policy ka ba myntoi lang ïa baroh bad shen ka sorkar kan sa shim ïa ka sienjam kaba bha tam” la ong ka Dr. Ampareen.
