Shillong, Risaw 29: Ka Meghalaya High Court ka la pan ka jubab ba ka sorkar pdeng bad na ka sorkar jylla bad ba kin ai ïa ki jubab jong ki ha ka dur jong ka affidavit haba ïadei bad ka jingmad jong ki paidbah ïa ka jingshah pynthut na ka daw jong ka jingïakob khwai dohkha.
Ka division bench kaba kynthup ïa u Chief Justice Soumen Sen bad u Justice W Diengdoh ka la pynmih ïa kane hadien ba la sngap bad bishar ïa ka Public Interest Litigation (PIL) ba la register halor ka nongrim ka shithi na u Bah Joannes JTL Lamare, kaba ïadei bad kane ka kam.
Ka Ïingkashari ka la aipor 3 taïew ïa ka sorkar ban jubab ïa kane ka PIL. “Ngi la sngap ïa ka jingpynsngew jong u learned Advocate General na ka bynta ka sorkar jylla bad kumjuh na ka DSGI ba jubab ha ka liang ka sorkar pdeng. Ngi la bthah ïa ki nongjubab ba kin phah ïa ki jubab jong ki ha ka dur ka affidavit haba ïadei bad ki sienjam ba la shim bad ïa kane kin hap jubab hapoh ki 3 taïew,” ong ka bench ki nongbishar ha ka hukum ba la pynmih ha ka 27 tarik mynta u bnai.
Ka Ïingbishar ka la buh ban shim bishar biang ïa kane haduh ka 25 tarik jong u Naiwieng.
