Shillong, Risaw 05: Ka Meghalaya High Court ka la kyntu ïa ka sorkar jylla ban pynshai ba balei ka la buh pud ïa ki jingtyrwa ne bid na ka bynta ban sam ïa ki tin sopïing ne aluminium roofing sheets sha tang katto katne ki nongshna tin sopïing. Ka Ïingbishar ka la buh biang ban pynlong ïa ka jingbishar haba ïadei bad kane ka mukotduma ha ka 14 tarik mynta u bnai bad ka dang ap ruh ïa ka jubab na ka sorkar halor kane ka kam.
Ha ka jingbishar ba la ujor da Manaksia Aluminium Company Limited, ka High Court ka la ong ba ka jingartatien kaba sah ha ka jingmut jong ka ïingbishar ka long la ka la don ka jingpynkylla ïa ki clause kumba la bsuh ka la don ne em ka jingkylla haba ïadei bad ka eligibility criteria, ne da ka jingpynneh kaba donkam jong ka registration bad ka MIIPP, hato ka jingpyrkhing ka dang don ne em.
“Watla khlem artatien ka court kam lah ban bujli ne batai ïa ki kyndon ne clause palat ïa ka jinglong jingman ba la thoh hapoh ka tender, kaba sngewkhia pat ka long ba ïa ka Article 14 ym lah ban pynkheiñ, ban pynthikna ba kan don ka jingïalehkai kaba ïa biang lang khlem ka jingbuh pud ïa ki bid kaba long tang ïa kumba katto katne ngut ki nongshna tin sopïing,” ong u Justice Hamarsan Singh Thangkhiew ha ka hukum.
“Kum ka Ïingbishar ka bthah ïa ka sorkar jylla ban pynshai ïa kane ka kam ha ka jingshim bishar ka ban sa wan. Da kaba buh ha ka jingmut halor ka jingshisha bad ka tarik ba khatduh ïa ka jingaiti ïa ki bid katkum ka NIQ la buh ha ka 15 tarik mynta u bnai, 2024 ha ka por 2 baje nohphai sngi, ai ba kane ka kam kan wanmih ha ka 14 tarik mynta u bnai, 2024 ha ka motion column na ka bynta ban dang ïoh ka jingpyrkhat,” u la bynrap.
