Pan jingmut ka Myntri na ka Health Advisory Board halor ka kam khaïi met bad dawai kynbat

Shillong, Nohprah 10 : Ka Myntri ka Koit ka Khiah Kong Ampareen Lyngdoh ha ka sngi Thohdieng, ka la lum ïa ka jingïalang jong ka Health Advisory Board (HAB) bad bthah ba kum ka Board ki dei ban shong pyrkhat bad ai jingmut kumno ba ka sorkar kan leh halor kine ki kam khaïi met ki kynthei bad kumjuh ruh halor ka jingkyntiew shuh shuh ïa ka jingsumar da ki dawai kynbat’.
Haba iakren bad ki nongthoh khubor, ka Kong Ampareen kala ong “Ka Advisory Board mynta kan khmih ïa kine ki artylli ki kam ba kongsan bad ban ai jingmut sha ka Sorkar kumno yn leh bad ban pynkut shisyndon ïa ki jingeh kiba mad mynta ha ka imlang sahlang”.
Ka la ong ba kan bha shibun ban ai da ki kam sha kine ki Board, kiba la don la slem bha, ïa kaba la kynnoh ba ki dei kiba la shu thung tang ban pynhun ïa ki riew sain hima sima.
Ka kong Ampareen kala ong ba la kyntu ïa ka Board ba kan pynkhreh da ka project ka ban khmih ïa ka kam khaïi met ki kynthei haba khmih ruh ïa ka jingnang kiew sted ka jingpang HIV/AIDS hapoh Meghalaya.
“Nga kmen shibun ban don ka jingïasyllok kaba bniah bad ki bad nga la kyrpad ïa ki ba kin pynkhreh da ka project ka ban khmih ïa ka kam khaïi met ki kynthei. Kaba kum kiei ki jingai jingmut ba kane ka Health Advisory Board ka lah ban ai sha ka Tnad ka Koit ka Khiah khnang ba ngin pynthikna ba ngin shim ïa ka sienjam kaba dei shuwa ban ïakren bad kine ki kynthei die met. Kaei kaba ngi dei ban leh ïa kane ka kynhun ki nongshong shnong, kiei ki kam ba ngi hap ban khmih, kiei ki jingeh ba ngin ïakynduh” kala ong.
“Haba khmih ïa ka jingkiew sted ha ka jingdon ki nongpang HIV/AIDS hapoh ka Jylla, lada ngim ïashong bad ïakren paidbah bad ïasyllok ïa kane ka kam, nga sngew ba ngi la klet ïa ka kamram ba ngi dei ban leh khnang ban pynthikna ba ki nongshong shnong kin long kiba shngaiñ, ki nongshong shnong kin ïoh ïa ki jingai jingmut, ki nongshong shnong kin hap hapoh ka jingkhmih bniah kam pher ïa kaei ka kam ba ki leh manla ka sngi” kala bynrap.
Ka Myntri ka pyntip ba u Chairman ka Board Bah Mayralborn Syiem ula kyrpad ïa ka Sorkar ban shah ïa ka Board ba kan ïashong bad ki stad ki jhad ha ka ban ïakren ïa ka kam ba ïadei bad ki nongsumar dawai kynbat, ki kobiraj, kiba dei ki nongsumar ba paw bha ha kylleng ka Jylla.