Ka jingai jaka sa 1.4 akar ïa ki Harijan ka dei ka jingpynbiej elekshon MP: Adelbert Nongrum

Shillong, Nohprah, 10: U MLA jong ka Voice of the People Party (VPP) ka North Shillong Constituency Bah Adelbert Nongrum ha ka sngi U Blei u la kynthoh ba ka jingai tam ka Sorkar Jylla sa 1.4 akar ka jaka ban shna ïa ki iing jong ki 342 tylli ki longïing kiba sah ha Them Iewmawlong ha Quater jong ka Shillong Mucipal Board (SMB), ka dei tang ka jingpynbiej elekshon MP bad MDC.
Ha ka sngi Palei jong ka taiew baladep ka jingïalang ba la khlieh da u Symbud Myntri Rangbah ka tnat Kam Pohïing Bah Prestone Tynsong bad u Symbud Myntri Rangbah ka tnat Pynroi Sor Bah Sniawbhalang Dhar ki la kular hakhmat ki nongïalam jong ka Harijan Panchayat Committee (HPC) ba ka Sorkar Jylla ka la mynjur ban ai tam ïa ka jaka sa 1.4 akar nalor kaba ladep ai mynshwa 2.14 akar.
Ha u kyrwoh ba la phah sha ki lad pathai khubor u Bah Nongrum u la pynkynmaw ba katkum ka jingshim jingkheiñ ba la aiti sha ka Sorkar, ki don tang 184 tylli ki longing ba la ithuh kum ki nongtrei ka Sorkar.
Na kine, 128 ngut la ithuh kum ki nongtrei ka SMB bad 56 ngut kum ki nongtrei jong kiwei pat ki tnat treikam ka Sorkar.
“Ka long kaba sngew kyndit ban tip ba ki longing ki la kiew sha ka 342 tylli, kaba mut ba sa 158 tylli tam ki longing (la kynthup ïa ka List) na ka bynta kane ka jingpynkynriah sha ka jaka ba thymmai. Namrkata, ngi kwah ban tip kiei kine ki 158 tylli ki longing,” la buh jingkylli u Bah Nongrum.
“Ha ka jingïakynduh (hapdeng ka Sorkar Jylla bad ki nongïalam ka Harijan Panchayat Committee) ha kine ki khyndiat sngi ki ong ban sa pynkynriah noh da kaba ai jaka 1.4 akar, lehse kane ka dei ka jingpynbiej elekshon MP bad MDC,” ong u Bah Nongrum ha u kyrwoh khubor ba la phah lyngba ka Video sha ki lad pathai khubor.
“Kane ka dei kaba nga kren da ka jngsngewkhia ba ki paidbah ki dei ban sngewthuh ba kita kiba ju pyrta na ka por sha ka por ngi pyrshah ïa kane ka ishu kin sngewbha ban kynthoh namarba ngi dei ki trai shnong bad ki trai iing bad ngi dei ban sngewthuh kumno ban leh ïa ki nongshong wai. Ngin dang ïapeit bad ngin da ïai buddien ïa kane ka ishu,” la pynpaw u Bah Nongrum.
U la ong ba kum u MLA jong ka North Shillong Constituency u la ïai buddien khlem shongthait halor ka ishu ban pynkynriah ïa ki briew kiba sah ha Them Iewmawlong.
“Shwa ka elekshon 2023 nga ladep ban ong ba ka Constituency bad ka jaidbynriew baroh kawei kan ym khmihlynti ïa nga ba ngan leit iuhkjat (ha Them Iewmawlong) kum u kyrtong ne ba ngan ïapeiñ tang na ka bynta ka elekshon. La jied ïa nga ban ïakhun na ka bynta ka jingmyntoi jong ki pateng ki ban sa wan,” u la bynrap.
Shuh shuh u la buh jingkylli ruh ba balei ka Sorkar kum ka trai iing ka hap ban pyndem hakhmat ki nongshongwai.
U la ong ruh ba ka VPP kan sa leh la ka jong ka kamram ynda ka la wan ha ka bor.
U la kyntu ruh ïa ki paidbah ban sangeh noh ban khot ïa ki briew kiba sah ha Them Iew Mawlong kum ka ‘Harijan Colony’, ka ‘Punjabi Colony’ lane ‘Sweepers’ Lane’.