Kumno ka samla na Mawlai ka poi phong ïa ka pansngiat Miss International Hornbill ha Nagaland

Shillong, Nohprah 10 : Ka Meghalaya ha ka sien kaba nyngkong eh lyngba ka samla na Mawlai Nonglum ka samla Rachel Rimeïaka Jyrwa, ka la ïoh ban khur ïa ka pansngiat Miss International Hornbill ha ka jingïakob thei bhabriew kaba long ha Nagaland dang shen.
Ka jingïoh jong ka ban phong ïa katei ka pansngiat ka la pynlong ïa ka Fashion Society Shillong kumjuh ïa ki thei bhabriew kiba bat ïa ka nam ha ki snem ba la dep ban kynduh lang ha kane ka sngi Thohdieng ha State Convention Centre ban pynkup burom ïa katei ka samla.
Lah ruh ban kdew hangne ba ka samla Rachel mynta tang ha ka rta kaba 19 snem ka la ïoh ruh ban khur ïa ka khusnam Miss Beautiful Smile bad Best Evening Gown ha katei ka lympung ïakob thei bhabriew ha Nagaland.
Shwa kane hadien ba la dep aiti ïa ka jingai sahkynmaw, u Chairman ka FSS, Bah Aldous Mawlong u la ong ruh ba ki don ka jingkyrmen ba kane ka samla ka lah ban poi wat shaduh ka kyrdan Femina Miss India.
Haba kren ha katei ka jingïalang pynkup burom ka samla Rachel ka la ïathuh ba ka jingshim bynta ha ka Miss Shillong ka la ai mynsiem bad pynshlur ïa ka ban jam shakhmat ha katei ka lympung.
Ka la pynkynmaw ba kum ka samla rit ka la sdang ban rung sha katei ka lympung naduh ba dang 15 snem ka rta hynrei ha katei ka por kam pat da ïoh bha ïa ka jingkyrshan na ki bahaiing.
“Dei hadien ba nga wan ba ar ha ka lympung Miss Mawlai 2022 ba nga la ïoh mynsiem shuh shuh bad rung sha ka jingïakob Miss Shillong. Naduh katei ka por ka la nang pynrhem shuh shuh ïanga haduh ba ngan da ïoh phong ïa kane ka pansngiat,” ka la ong.
Ha kajuh ka la ai burom ïa ka FSS hapoh ka jingïalam jong u Bah Aldous bad ka kynhun kiba lah ban pynwan dur bad plie lad ïa ka ha kane ka lynti ïaid.
Lah ban kdew hangne ba ka samla Rachel kadei ka khun ba nyngkong jong i Kong Phiralin Jyrwa bad Bah Daniel A Syiem.
La donlang ruh ha kane ka sngi naduh ka Kong Phiralin Nongbet ka lahduh ha ka Mrs Classic India pageant 2019, ka Kong Marjorie Noreen Dunai lahduh Mrs Shillong 2019 bad ka nonghikai ïa kitei ki thei bhabriew ka Kong Evarihun Warjri nalor kiwei kiwei.