Shillong, Nailur 14: Ki bahaïing jong u samla Steve Jyrwa ha ka sngi Saitjaiñ ki la kyrpad ïa ki paidbah nongshong shnong jong ka jylla ba kin kyrshan ïa u Samla Steve Jyrwa ha kane ka jingïakhun ïakob shad ha kaba ha kane ka kynti u la poi sha ka kyrdan kaba 6 bad lyngba ka jingkyrshan ki nongshong shnong da kaba thep ïa ki vote kiba kynsai jong ki un lah ruh ban poi shaduh ka phainal jong kane ka jingïakob.
Haba pyntip na ka bynta u Samla Steve Jyrwa uba la poi ha ka top 6 India’s Best dancers Sony TV show na ka liang jong ka Excutive commitee ka All Meghalaya Dancers Association ha ryngkat ki bahaïing u Samla Steve Jyrwa bad ka Shnong Nongmynsong ki la wan ban ai ka jingshai ïa ki paitbah shuh shuh kumno ban vote na u app Sony live namar don bun kim pat sngewthuh bha kumno ban vote ne kyrshan na ka bynta u Samla Steve Jyrwa ha kaba un vote paitbah biang u lyngba ki mobile number Sony live, ong u Bah Kitbok Thabah president All Meghalaya Dancers Association bad ka Kmie u Samla Steve Jyrwa ka Kong BB Jyrwa.
Ka President jong ka BJP Mahila, Kong Sukhi Pariat ka la kyntu ïa ki paidbah ka jylla ba kin snohkti lang da kaba ailem ïa ka vote jong ki na bynta u samla Steve Jyrwa (16snem) u samla uba la poi shaduh ka top 6 jong ka lympung ïakob shad kaba heh bha ha ka Ri ka India Best Dancers season 4 kaba long ha nongbah Mumbai khnang ba un ïoh ban rah ïa ka nam lahduh.
Kum ban shu kdew hangne, ki bahaïing ha sem ryngkat bad ka synjuk ki nongshad ki la kyntu ïa ki paidbah ba kin ai lang ka jingkyrshan na bynta utei u samla uba la lah ban jop ïa ka mynsiem jong ki Nongbishar ha katei ka rynsan shad kaba heh tam ha ka Ri.
“Nga kyntu ïa baroh ki nongshong shnong ka Jylla bad wat ha kiwei ki bynta jong ka Ri ba kin ai lang ka jingkyrshan kaba pura na ka bynta une u samla jongngi lyngba ka vote jong ki khnang ba un lah ban khur ïa ka nam lahduh,” ong ka Kong S Pariat ha ka kyrwoh khubor.
Ka la ong ruh ba kane kadei ruh ka rynsan kaba kum ki nongshong shnong kin pyni ïa ka mynsiem jingkyrshan haba don ki khun samla na ka jylla kiba la poi ha ki kyrdan ïakob kaba heh. Ka la pynpaw ruh ba kumno mynshwa ki nongshong shnong ka jylla ki khihwin ban ka jingkyrshan ia ki nongshim bynta ha ka Indian Idol.
“Mynta ka kynti ruh nga kyntu lang ïa ki paidbah ba phin mih ryntih biang kumba phi leh ha kito ki por ban ai jingkyrshan ïa u samla Steve Jyrwa,” ka la ong.
Dang ha kine ki khyndiat sngi, ki bahaïing jong u Steve ryngkat bad ka kynhun ki nongshad ki la kynduh ïa u Symbud Myntri Rangbah ka Jylla, Bah Sniawbhalang Dhar uba la ai ka jingkitbok ïa ki ryngkat ka song pisa kaba 50 hajar tyngka.
U Ma Sniawbhalang ula kitbok ïa u Steve uba la rung sha ka Top 6 jong katei ka jingïakob ba un lah syndon ban rah ïa ka nam lahduh ha katei ka jingïakob shad hapoh ka ri ban wanrah nam bad burom ïa ka jylla bad ïa ka jaidbynriew.
Nalor kane, ula kyntu ruh ïa ki paidbah nongshong shnong ka jylla ba kin kyrshan ïa u Steve da kaba ïashimbynta ha ka jingthep vote khnang ba u Steve un ïoh ïa ka jingjop ha katei ka jingïakob shad.
Ula kular ruh ïa ki kmie ki kpa jong u Steve ba un pynïakynduh ïa ki bad u Myntri Rangbah ka jylla Conrad K Sangma khnang ba na ka liang ka sorkar jylla ruh kan ïoh ban ïarap na ka bynta ban pynsaphriang ïa ki jingtip sha ki paidbah ka jylla ba kin kyrshan lem ïa u Steve ha katei ka jingïakob.
Na ka liang ki nongïalam jong ka seng ki nonghikai shad ha ka jylla, u Bah Kitbok Thabah u la ong ba ka bynta kaba kongsan eh mynta ka long ïa ki paidbah ba kin thep vote ban kyrshan ïa u Steve ba un poi sha ka thong namar kumba long, ka jingkhlaiñ jong u Steve ka dei na ka jingïoh point na ki nongbishar hynrei lada u Steve u khlaiñ sa ha ka jingïoh vote un dang lah ban jam shaphrang ban poi syndon sha ka Grand Finale.
U la kyntu ïa ki paidbah ba kin kyrshan lem ïa u Steve ba un poi sha ka thong jong ka jingjop bad ba kin ïashimbynta ha ka jingthep vote ha ka Sony LIV App lyngba ka Google Play Store bad na kawei ka Account lah ban vote haduh 50 sien ban pynthikna ba u Steve un long u lahduh ha ka India Best Dancer Season 4.
