Nongstoiñ, Risaw 17: Ka Khasi Student Union (KSU) Lyngngam Hynnengbrei Area Unit ha ka sngi hat majai, ka la leit ban jurip ïa ka Shallang PHC hadien ba la ïoh ïa ka jingujor na ki paidbah nongshong shnong, halor ka jingbym don doktor ha katei ka PHC. Ha ka jingjurip, ka seng ka la lap dalade hi ba katei ka PHC ka la treikam khlem u doktor mynta la kumba 2 bnai.
Nalor ka jingbym don u doktor, ka seng ka la lap ruh ba katei ka PHC ka dang duna ha kiba bun ki liang, khamtam ha kaba ïadei bad ki jingduna ki kamra thiah ïa ki nongpang, ka jingbym biang ki dawai dashin bad kiwei kiwei kaba la nang pyndkoh shuh shuh ïa ka rukom treikam jong katei ka PHC.
Halor kane ka jingeh ba ki paidbah ka thaiñ ki ïakynduh, na ka liang jong ka KSU Hynnengbrei Area Unit hapoh ka jingïalam jong u president samla Anselm Ryntong, ki la leit ban ïakynduh markhmat ïa ka DM&HO West Khasi Hills, ban ujor halor katei ka jingbym don Doctor ha kane ka PHC bad halor ka jingbym biang ki lad ai jingsumar kaba la buh jingeh ïa ki paidbah, khamtam haba don ki jingjia ne jingshitom, kiba donkam kyrkieh ïa ka jingïarap.
Ka Seng ka la dawa ruh na ka tnad ka koit ka khiah jong ka sorkar Jylla bad kumjuh na u MLA ka Mawshynrut Constituency u Bah Methodios Dkhar, ban phai khmat lem sha katei ka PHC kaba la ju ai jingshakri ïa kiba bun phew tylli ki shnong ka Shallang C&RD Block hapoh Mawshynrut.
