Shillong, Nailar 28 : U Symbud Myntri Rangbah ka Jylla, Bah Prestone Tynsong u la ong ba ka Sorkar Pdeng ka la buh ïa ka thong ba ka jylla Meghalaya kan shna palat 1250 kilometar ka surok lyngba ka Pradhan Mantri Gram Sadak Yojana (PMGSY) Phase-III.
Haba jubab ïa kane ha ka Dorbar Synrai ha kane ka sngi Balang, u Symbud Myntri Rangbah u la ong ba ha ka kylla ba nyngkong jong ka PMGSY-III, ki la ïoh ïa ka jingmynjur na ka Ministry of Rural Development na ka bynta ban shna haduh 400 kilomitar ka surok.
Shuh shuh u la ïathuh ba mynta ka sorkar jylla ka dang ap ïa ka jingmynjur ïa ka mang tyngka na ka bynta ban pyntreikam ïa ka kylla kaba ar ha kaba ki la dep ban phah ïa ka detail project report (DPR) na ka bynta 600 kilomitar ka surok.
“Nga ngeit skhem ba ngin sa ïoh ïa ka jingmynjur na ka bynta kane ha ka por kaba biang,” u la ong.
Shuh shuh u Bah Prestone u la pyntip ruh ba ka tnad ka la dep pynjynsur ïa ki kyndon ban pyntreikam ïa ka PMGSY-III ha kane ka jylla Meghalaya hadien ka jingkyrpad ba la buh da ka sorkar jylla ha ka jingleit kynduh dang shen hapoh ka jingïalam jong u Myntri Rangbah ka jylla u Conrad K Sangma.
Katkum kane, ki projek kiba don ha ka thup ba kongsan mynta ki la rung ha ka PMGSY-III bad ka sorkar ka la buh thong ba ka jylla kan pyndep ïa ka jingtei ïa ki 1250 kilomitar ka surok hapoh kane ka snem mang tyngka 2024-2025.
Shwa ïa kane, u Bah Prestone u la pyntip ba ïa ka jingtyrwa ban shna ïa ka surok naduh Photjaud – Tynnai sha Mawbidong ha Block Mawkyrwat la tyrwa ban kynthup hapoh ka Pradhan Mantri Gram Sadak Yojana – III.
Na ka liang u MLA ka UDP na Mawkyrwat, Bah Renikton Lyngdoh Tongkhar u la ong ba ki paidbah ki la byrngem ban mih ïakhih pyrshah ïa ka sorkar lada jia ba katei ka surok kam ïoh ïa ka jingmynjur.
U la ong ba lada jia ba katei ka surok kam lah ban ïoh ïa ka jingmynjur na ka tnad, la kyntu ïa ka sorkar ba kan pyrkhat ban mang tyngka noh na ka state plan.
Kumta, halor kane, u Bah Prestone u al ong ba ka jingong ba ka surok kan ïoh ne kam ïoh ïa ka jingmynjur kam mih satia namar ba ka la don lypa ha ka thup ki surok ba kongsan kiba ap mynta sa ïa ka jingmang pisa na ka Sorkar Pdeng.
