Shillong, Nailar, 28: U Symbud Myntri Rangbah ka Jylla uba khmih ïa ka tnat District Council Affairs u Bah Prestone Tynsong ha ka sngi Balang u la ïathuh ba ka Sorkar ka dang bishar bniah bin pa bin ha kaba ïadei bad ka jingpynlong ïa ka elekshon jong ki Autonomous District Council (ADC).
Katkum ka jingong jong u, ïa ki tarik ban pynlong ïa ka elekshon jong ki District Council ka sorkar ka dang pynkhreh.
Ïa mynta, ka samoi treikam jong ki ar tylli ki District Council ha rilum Khasi bad Jaiñtia la pynjlan na ka bynta hynriew bnai, ka ban sa kut noh ha ka 5 tarik Nailur, 2024.
Ha kaba ïadei bad ka jingailad ban pyndonkam ïa ka ktien tynrai ha ka por bam smai ha ki lai tylli ki ADC, u Bah Tynsong u la ïathuh ha ka jubab ba la ai ha Assembly ba ka Rule 37 jong ka Assam and Meghalaya Autonomous Districts (Constitution of District Councils) Rules, 1951 (Amended) ka shah ïa u dkhot ban kren hapoh ka Council da kano kano ka ktien tynrai kaba hap hapoh u pud treikam jong ka District Council lane ïa kano kano ka ktien ba la ithuh da ka Jylla.
