Ka Dorbar Synrai ba 5 sngi jong ka Meghalaya ka la khluit hi tar ha ka sngi Hatmajai 27.08.24 haba ki MLA jong ki arliang mamla ki ïatai shaphang ka jingkyrduh jong ki samla ba la nang la stad ha Meghalaya. La wanrah ïa kane ka motion da u Bah Lahkmen Rymbui hynrei ka jingïathir ba sani bha dei u Dr Mukul Sangma bad u Bah Ardent Miller Basaiawmoit.
Ka long kaei kaei kaba sngewtynnad bha ban sngap kum ki nongpeitkai na rynsan, namar katei ka mat ka dei kaba kongsan tam ha kane ka Juk. Ka long shisha kaba isangsot ïa ki khun samla jong ka Jylla haba ki la pyndep ïa kyrdan Master degree bad Ph.D ruh ki dang shongsngi. Hato ka sorkar kam ïohi mo ïa kane ka jingeh.
Watla u nongthoh um da kubur than ba baroh khoit kiba ngop ha ki jingmlien basniew kum u Kynja, Drugs, Aphin, Kyiad, ki kam tuh bad lute dei na ka jingkyrduhkam hynrei shipowa na kiba la ngat, dei na katei ka daw. Ki samla haba ki sngew kut lad ym don shuh shawei ban phai, lait noh da kaba shu shangmakia ei ha ki lad bad ki surok ba ngop ha ki jingsniew ba laiphew jait. Ngi shait ïohsngew ruh ba ka sorkar haba ïa tyngkhuh bad ki samla ba kieng atiar, ka shait ong ba ki dei ki samla ba la bakla lynti (misguided youths). Ka suk bha ban biah phongrai kumta, hynrei haba wadbniah don ki daw kiba lah ban dei na ka jingbym ïohkam ïohjam ruh ba ki sa poi sha kitei ki jait kam. Katkum ka datacommons.iitm.ac.in, ka ïathuh ba ka Meghalaya ka don sha ka position ba 30th ha ka jingbym ïohkam ha ki nongkyndong, hynrei katkum ka Periodic Labour Force Survey (PLFS) 2022-2023, ka jingbym ïohkam ha Meghalaya ka long 6%. Halor ka jingkam sarong jong ka sorkar MDA ban poi sha ka thong jong ka 10$ billion US dollars economy ha ki san snem, ka Meghalaya ka poi pynban sha tdong ha ka Sustainable Development Goal (SDG) Indïa Index 2023-2024, katkum ka kaiphod ba la pyllait paidbah da ka NITI Aayog (Planning Commission), napdeng ki 28 tylli ki State ha Indïa, ka Meghalaya ka don ha ka number ba 25, katba ka Sikkim ka don ha ka position no.7, Mizoram 13th, Manipur 15th, Tripura 16th bad Assam 23rd. Kumta, ka Meghalaya ka don ha ka kyrdan jong ka Jylla baduk tam.
Halor katei ka jingïatainïa ha Iingdorbar Thaw-aiñ, kaba sngewtynnad ka dei ka jingkren jong u Dr Mukul Sangma ha kaba u la sei lut ïa ka jingbymlerkam jong kane ka sorkar MDA. Sep-ei ki jubanlak ba ki khlei ha ka por election ban aikam aijam ïa ki samla, phewse ka dei tang kum ka jingphon mit mit ïa ki khynnah rit. U Dr Mukul u ong, phi lah ban mutdur ba kane ka sorkar ka nud ban ai tulop tang Rs.12,000/- ïa kiba la pass Ph.D, kata ruh ‘on Contractual basis’. Da ki hajar bad phew hajar tylli ki post ba lait ha ki kyrdan bad ki department bapher bapher, ka MDA ka leh beit ha katei ka style ban shu thung adhoc, ka mut hap ban pan extension ha man ba kut ka 59 sngi. Kumno phin khmihlynti ban ïoh ïa ka jingtbit treikam (quality of works) jong ki haba kim sngew thikna (secured) ïa kata ka kam. Utei u MLA TMC na Songsak Constituency, u ong, kham mynshwa lada rung ha Secretarïat, sngewshngaiñ; namar bun kiba trei ki dei ki briew lajong hynrei mynta pat, phin shem ba ki dap satang ki briew ba nabar jylla kiba trei lyngba ki Consultant bapher bapher. Ki Consultancy ki don ha manla ki department ba kham heh, lehse la leh ïa kata lyngba ka Single Window jong ka sorkar.
Kitei ki Consultant pat ki thungkam thohmut thohmat ïa ki samla jong ngi ryngkat ba ka jingsiew ba long tang kum ka bai shun jong kiba bam kwai. Te haei yn khmihlynti ba ki samla kin kiew. Ka rukom khot application na ka bynta ki kam ba lait ruh ka long tang shipor, kumba ong u Bah Ardent, jia aiu ïa ki Nonghikai bad ki Nurse kiba la ïoh appointment, hynrei namar ba shu thung contractual/ne casual tang shu kut 8-10 snem hap khot application bïang da kawei. Kumno phin pynïaryngkat dor ïa kito kiba la trei da ki phew snem ba la kham sarang ka jabieng ban pynïakhun exam interview bad ki samla kiba dang shu pass (Freshers). Dei ha katei ka rukom ba bun na ki nonghikai kiba la kyrshan khaw ïa la ka ïing ka sem ki shah kyntait noh, kat haduh ba pynlong ïa ki ban shu shang bidai ei, namar ban puh lyngkha ruh ym lah shuh, ban wadlad da kiwei pat ki kam ruh ka la dier ka rta. Nangta, u Dr Mukul u ther shuh shuh da kaba kylli shano ki jah ki regular sanctioned post bad shano la pynïaid ïa ka peisa ba la pynmang na ka bynta ka salary jong ki nongtrei? Lada phi ong ba ki samla kin trei hi la ka kam lajong ruh, kim biang ka baiseng bad ka jingtip ba paka ïa kata ka jaitkam namar ka Education System ha India hi ka long kumba phi phah kiew ïa ka dohkha halor dieng ha ka jaka ban jngi. Kumba ong u nongkyntip (interviewer) haba u phai sha ki nongwan interview, kata sha ka sim, u shrieh, penquine, u hati, ka dohkha, u ksih bad u ksew, na bynta ka jingkhuid jong ka jingïakhun, uwei pa uwei na phi, phi dei ban kiew ïa utei u dieng. U Albert Einstein uwei na ki riewstad u ong, “Uwei pa uwei u dei uba proh jabieng hynrei lada phi bishar ïa ka jinglah jong ka dohkha ban kiew ïa u dieng, kan im ka jingim kaba pynsah kale pyn ka baroh shirta”. Ha kawei pat ka liang, haba phai sha ka scheme ai jingïarap ïa ki nongrep ban thung dieng (plantations) lyngba ka tnat Agriculture, Horticulture, ka la duh noh namar kiba wan ban supply tynrai dieng dei na Assam ha ka dor baheh, lehse dei ka jingïohnong jong ki middlemen. Nangta, shwa ka snem 2018 haba phi rung sha ki office PWD, PHE, Sports, Forest, MeECL, Tourism, Education bad kiwei, phin ïohi wat ki longkmie ki ïalum paidbah ban thep tender ïa ki kam katba kot ka bor jong ki, hynrei mynta ha kane ka sorkar wat ïa ka kam Contract ruh la knieh noh namar ïa ki kam barit la buhthup beit tang ha kawei ka song (Package) bad la shna ruh ïa ki kyndon, ha kata ka rukom khnang ba ki briew jong kiba shong ha ki shuki sorkar kin bam jem da kaba suk. Dei namarkata ka daw, ym don shuh ba kwah wat tang ban register ïalade ruh, namar kam mih wat tang ka bai register ruh, haba kumta kam kiew heit ka jingkyrduhkam. Ka jingpynmih result arsien ïa ka jingïakhun MCS lyngba ka MPSC dang shen, ka paw shai kdar ïa ka jingmushlia jong ki High level ha baroh ki jait kam. Shaei shuh kata ka merit basis?
Nangta, la ai scheme ri sniang ri syiar kum ka jingaikam, namar bym biang ka Vet-care, shu ïap ei ka sniang ka syiar, nang kyrduh shuh shuh ki nongri jingri. Katkum katei ka jingïatai, ki don bun ki rai jong ka Supreme Court kum ka jingtuklar lada phi pynduh noh ïa ki sanction post sha ki Contractual. Bun ki longiing ki pang mynsiem namar ka lawei ba dum jong ki khun ba la nang la stad bad ka bym don jingkyrmen satia bad ka Mynried kaba dum. Kane ka la buh jingeh wat ïa ki samla ba kin shu shongsyier sah, haba ki peit ïa kiwei pat ki barjylla ba wan bylla bad wantrei shane ka long pynban jingpynkhih bitar ïa ki. Mutdur lada lah ban pynïohkam tang 60-70 percent ruh, katno ka imlang sahlang kan long kaba shngaiñ, namar haba don ka kam kim don por ban shong thad lad bad ka Police department ruh kan kham ïoh shongthait. Hynrei lada jia kum ha DSC, East Garo Hills ha kaba haduh 4 ngut kin pass interview tang na kawei ka longiing, te phi la sngewthuh kaei ka bor na shalyndet bad katno kan pyndukha ïa kiwei pat ki samla wadkam.
Khatduh eh, katei ka mat ba wanrah u Bah Lahkmen Rymbui MLA Amlarem Constituency kan jin da la long ka jingtem ksing kaba jur, lada kum u Education Minister ha kato ka por um pynduhkam ïa ki spahngut ki nonghikai ba la rim, ki bym pass MTET bad lada ym tah ‘Sia lieh’ ha kato ka por. Ka sohkhliang jong kitei ki nonghikai barim kiba la wan shah thngan bad shah kyndang jubor ha ki pulit bun sngi sha nongbah Shillong ban dawa ïa la ka Hok, kan ïaisah junom ha dohnud jong ki namar ïa ka pliang ja la knieh noh kha ma kha. Te kumno keiñ yn heh tyngam mynta halor ka jingkyrduhkam haba wat ïa kaba la ïoh ruh dang knieh? Lymda don ki ka jingkylla, khlem pep ki paidbah kin sa ai jubab biang kumba ki ai ha kane ka Election MP ba dang shu dep.
