Nalor ka Civil Sub-Division ha Mawsynram dang bishar bniah ka sorkar wat ïa ka Distrik thymmai ha EKH

Shillong, Nailar 28 : U Symbud Myntri Rangbah ka Jylla, Bah Prestone Tynsong ha ka sngi Balang u la ong ba ka sorkar jylla ka dang bishar bniah halor ka jingkyrpad na ka bynta ban kyntiew kyrdan Civil Sub-Division noh ïa ka Mawsynram C&RD Block bad kumjuh haba ïadei bad ka jingpynkha distrik thymmai ha East Khasi Hills District.
Haba jubab halor ka jingkylli ba wanrah da u MLA ka Mawsynram, Bah O Suiñ ha ki kynta kylli jingkylli, u Bah Symbud Myntri Rangbah u la pyntip ruh ba ka sorkar jylla ka dang bishar bniah ruh wat haba ïadei bad ka jingtyrwa ban pynmih shuh ïa ki C&RD Block thymmai ha ka jylla.
“Ka jingthmu ba kongsan jong ka sorkar ban thaw ïa ki district thymmai, ki civil sub-division bad ki C&RD block ka long ban wanrah ïa ka jingsynshar kaba kham jan sha ki paidbah,” u la bynrap.
Shwa kane, u MLA ka Mawsynram u la ong ba ka Mawsynram ka dei hok ban ïoh ïa ka civil sub-division namar ka jingbun briew ha katei ka thaiñ ka kham bun wat ïa ka Pynursla bad ka Ranikor Civil Sub-Division bad don ki shnong kiba ka jingjngai ka la poi sha ka 100 kilometer.
“Kumta dei sa tang ka civl sub-division kaba lah ban pynjan ïa ka synshar khadar sha ki paidbah,” u la ong.
Haba ïadei bad kane, u Symbud Myntri Rangbah u la pyntip ba ïa kane ka jingtyrwa ban thaw ïa ka civil sub-division ha Mawsynram ka don mynta ha kajingbishar bniah jong ka sorkar.
“Dei tad hadien ba la dep bishar bniah ngan sa lah ban ïathuh ïaphi bad ïa ki paid ka Mawsynram, ” u la ong.
Shwa kane, u MLA ka Nongthymmai, Bah Charles Pyngrope u la kyntu jur ïa ka sorkar ba kan bishar bniah wat ban thaw ïa ka distrik ba thymmai da kaba buh hakhmat eh ïa ka East Khasi Hills kaba dei ka distrik kaba heh tam.