Shillong, Nailar 28 : U Myntri ka tnad kam jngohkai ka jylla u Bah Paul Lyngdoh mynta ka sngi Balang ula ong ba ka kam jngohkai ka dei kawei na ki ladbah ban kyntiew ïa ka ïoh ka kot jong ka Jylla Meghalaya.
Haba jubab ïa ka short duration discussion ha ïing Dorbar Thawaiñ ka jylla,u Bah Paul ula ong ba ka jingïohi jngai jong ka Tnad jong u ka long ban buh ïa ka Jylla kum kawei na ki jaka wan shangkai ba khring bha bad ba kyntiew ïa ka kam jngohkai kaba neh bad kaba don jingkitkhlieh, ka ban ai jingmyntoi ïa ki nongwan shangkai bad ki trai shnong.
La antad ba kumba 50,000 ngut ki briew ha ka Jylla kila shaniah ha kane ka kam ban kamai jakpoh.
“Haba pynsngewthuh ïa kane, ka Sorkar Jylla ka la kut jingmut ban pynroi ïa ka kam jngohkai kum ka lad ban aikam aijam, ban nang pynbun ïa ki kam kamai jakpoh bad ban kyntiew ïa ka rukom im jong ki nongshong shnong ka Jylla” ula ong.
“Baroh ngi tip ba ka kam jngohkai ka dei ka lad thaw kam bad kaba pyniar ïa ka jingaikam aijam kaba don ruh ïa ka kabu ban long kawei na kita kiba noh synniang ïa ka GDP. Ban pynurlong ïa ka thong ka jong ngi, ngi lah dep ban ithuh ïa ka jingdonkam ban thaw ïa ki jingtei kiba kongsan ha ki jaka kiba la don lypa bad kiba thymmai ki ban kynthup ruh ïa ka jingtei ïa ki jaka sah kiba thymmai ban pynbha ïa ki jaka kiba don ha ki jaka kiba itynnad bad ban kyntiew ha baroh ki liang khnang ba ka jingwan ki nongjngohkai kan long kaba kin sah jingkynmaw bad kan long ruh da ka jingthmu ban pynlong ïa ka Meghalaya kum ka jaka kaba kongsan tam kaban don ïa ki mar ki mata, ka Adventure Tourism, Experiential Tourism bad ka Cultural Tourism,” ong u Bah Paul Lyngdoh.
Ula bynrap ruh, “Ka sorkar kala dep ithuh, ba ka long kaba donkam ban bhah tyngka shuh shuh na ka bynta ban tei ïa ki jingtei. Kumta ngi la dep ban pynwandur ïa ka jingthmu ban pynmih ïa ki jingdon jingem ym tang na ka bhah tyngka jongka sorkar jylla hynrei wat ruh na ki skhim jong ka sorkar pdeng bad ki Externally Aided Project (EAP)”.
Kawei na ki sienjam kiba kongsan ha kaba ïadei bad katei ka bynta ka dei ka jingpyntreikam ïa ka Meghalaya Eco Tourism Infrastructure Development Project, kaba dei ka Externally Aided Project hapoh jongka New Development Bank.
“Ha ka jingbhah tyngka kaba kot T.730 Klur, katei ka project ka thmu ban tei ïa ki jingtei kiba don nam ha ki jaka jngohkai kiba kongsan kum ha Sohra, Shillong bad Tura. Nalor kane, ngi lah ïoh ruh ïa ka bhah tyngka kaba T. 60.29 Klur lyngba ka Swadesh Darshan 2.0 naka bynta ban kyntiew ïa ka Meghalayan Age Cave Experience & Water Falls Trails ha Sohra,” la ong u Myntri Sorkar.
Ula ïathuh shuh shuh, “Ngi la ïohpdiang ïa ka bhah tyngka na ka Ministry of Tourism kaba T. 50 Klur hapoh jongka Challenge Based Destination Development, kaba dei ka skhim jong ka Swadesh Darshan 2.0.”
Ula ong ba ka sorkar Meghalaya ka ïeng skhem ha ka ban bteng ban kyntiew bad pynbha ïa ka kam jngohkai kaba ki la tyrwa bad pynleit jingmut na ka bynta ban wanrah ïa ki lad kiba thymmai bad kiba kyrpang ka ban long na ka bynta ki nongjngohkai na kiwei pat ki ri bad kiba napoh ka ri, nuksa na ïa ka Jaintia Hills kaba la kiew kynsan kum ka jaka jngohkai kaba ki nongjngohkai ki sngewtynnad ban leitkai ha ki jaka kiba don ha Ialong, Syntu Ksiar, Krang Suri, Shnongpdeng, Darrang bad Iooksi.
U Myntri ula pyntip ruh ba ka sorkar kala sdang ruh ïa ki prokram kiba thymmai ban kyntiew ïa ka kam jngohkai ha ka jylla bad ka bynrap ba ka Meghalaya Home Stays Scheme kaba ïaid ryngkat bad ka PMEGP ka ai haduh 70% ka Subsidy kaba T.10 lak ban kyntiew ïa ka jingtei ïa ki Home Stay ha ka jylla kaba pynshlur ruh ba kan don ka jingdonbynta lang jong ka shnong ka thaw ha ka kam jngohkai.
Baroh ki don 633 tylli ki Home Stay kiba la dep ban bhah tyngka naduh ba la sdang ïa katei ka scheme.
Lyngba ka Chief Minister Elevate program la buh ïa ka thong ban kyntiew ïa ka jingsengkam lajong da ki samla ka jylla ha kaba la ai jingkyrshan da ka song tyngka bad kumba long mynta, kila don 50 ngut ki nongseng kam lajong kiba la ïoh jingmyntoi naduh ba la sdang ïa katei ka scheme.
U Myntri ula pynpaw ruh ïa ka jingsngewkhia ïa ka jingjia haka Lad Umtyngar ha ka 30 tarik u Naitung bad katei kala ktah jur ïa ka kam jngohkai.
Ula pyntip ba katkum ki kaiphod la kdew ba kala don 30% ka jingpynsangeh noh ïa ka jingbat ïa ki jaka sah ha ki Hotel ha ka 26 tarik u Naitung bad 50% ka jingpynsangeh noh ïa ka jingleitkai bad kiwei kiwei ki kam ha ki sngi kiba bud. Katei ka jingjia kala lam sha ka jingsngewkhia ïa baroh kiba don bynta ha ka kam kaba ïadei bad ka kam jngohkai.
Ka Tnad Tourism kala shimkhia mardor da kaba pynlong ïa ka jingïalang ha ka 14 tarik u Nailar bad ha katei ka jingïamir jingmut la ïatai sani halor ki mat kiba kongsan kaba kynthup ïa ka jingdonkam ban don ïa ki surok kiba bha, ka bording elektrik, ka jingtreikam jong ka kor Internet, ka jinglum jinglang ha ka rukom kaba biang ïa ki niut ki nier, ki lad ban pynïaid ïew, ka jingtbit ban treikam, ban pynkylla ïa ka rukom pyrkhat pyrdaiñ, ban ïada ïa ki nongjngohkai na ki riewshimkabu ne nongleh thok, ka jingkamai ki kali shimet kum ki kali kamai bad kiwei kiwei.
Ki nongïashim bynta kiba don bynta ha ka kam, kila banjur ïa ka jingdonkam ban ïatreilang hapdeng jong baroh lang ban thaw ïa kaei kaei kaban long kyrpang bad kaba bha ïa ki nongjngohkai kaba kin ïoh ban mad bad kumjuh ruh ïaka jingdonkam ban don ha kawei ka rynsan ïa baroh kiba don bynta ha ka kam jngohkai.
