Khliehriat, Nailar 28 : Ki bahaïing jong u (L) Bah Kynjaimon Amse hynne ka sngi ki la leit ban ujor da ka ejahar ha Khliehriat Police Station namar kim sngew lah ngeit ba un khlad ha ka jingjia aksiden kali ha ka miet 23tarik mynta u bnai.
Ïa kane ka ejahar la ujor da u Mama jong u Bah Kynjaimon, u Bah Lalan S Amse uba la pynpaw ba kum ki bahaïing hasem kim sngew lah ban pdiang ba ka jingkhlad noh jong u Kynjaimon kan dei na ka jingjia aksiden.
“Ngi don ka jingsuba ba ka lah ban don kaei kaei sha lyndet, namar haba ngi peit ïa ka kali kaba u shong kam shym don dak mong eiei ha ka liang kaba u shong bad ka jngjulor ruh ka long tang khyndiat eh,” u la ong.
Kum ban shu bynrap, u (L) Kynjainmon Amse u bat ruh kum u Assistant Waheh Shnong jong ka Umkiang bad u dei ruh uwei na ki nongïasaid aiñ ne muktiar uba don ha ka Ditrict Session Court Khliehriat, East Jaiñtia Hills District.
