Shillong, Nailar 14: U Lat ka Jylla u C.H Vijayashankar bad u Myntri ka tnat C&RD u A.T Mondal ha ka sngi baar ki la ot ribon ïa ka jingïalap ne ka campaign pynher lama lai rong lane ka “Har Ghar Tiranga” campaign ha Raj Bhavan, Shillong.
Ha kane ka prokram na ka liang jong u Lat u la pynpaw ïa ka jingkmen ban ïashim bynta ha kane ka jingpyllait paidbah, da kaba ban jur ïa ka thong jong ka “Har Ghar Tiranga” ban pynïeng ïa ka lama ka ri ha man ki thliew ïing, kumba la thmu da u Myntri Rangbahduh ka ri u Narendra Modi.
Shuh shuh u Lat u la pynpaw ïa ka jingdonkam jong kane ka jingïalap kaba dei ruh kaba kyntiew ïa ka jingieid ri bad ka jingïatylli.
Ïa ka “Har Ghar Tiranga” la sdang da ka jingdap 75 snem ka jinglaitluid jong ka ri India, ban pynrung ïa ka mynsiem sngew sarong bad ka jingieid ri na ka bynta baroh ki nongshong shnong.
U Lat u la kubur ruh ïa ki jingnoh synñiang jong ka Meghalaya sha ka jingïaleh laitluid jong ka ri India da kaba kdew ïa ki nongïaleh laitluid ba pawnam jong ka jylla kum u Tirot Sing, u Kiang Nangbah, bad u Pa Togan Sangma nalor kiwei pat ki jingkren.
Ha kane ka jingïalang la sam ïa ki lama lai rong ka ri bad ka jingpyllait paidbah ïa ki ar tylli ki kot ba la pynmih da ka tnad Arts and Culture, “U Tirot Sing” bad “Ki dohnud shlur bad ki nongïaleh laitluid na ki lum.”
Ha kane ka prokram la wan shim bynta da ki heh sorkar, ki pulit, ki cadet ka NCC, bad ki self help group nalor kiwei kiba la shah khot sngewbha.
