Ong ‘Em’ ïa u duma uba wanrah shibun ki jingpang: NSS Volunteers

0

Mawkyrwat, Jymmang, 18: Ki National Service Scheme (NSS) Volunteers ryngkat ki samla pule jong ka Sngap Syiem College, Mawkyrwat, South West Khasi Hills District ki la ïa mih puk ha surok ha Mawkyrwat ban pynlong ka jingïa-ïaid paidbah ryngkat ka jingpyrta ban ong ‘em’ ïa u Duma.
Ïa kane ka jingïa-ïaid paidbah jong ki samla pule la sdang na phyllaw jong ka Sngap Syiem College, Mawkyrwat bad ïaid haduh ha Ïew Mawkyrwat bad pynkut biang ha Sngap Syiem College, Mawkyrwat ha kaba ka la rah ryngkat ki plakat ba la don jingthoh bad ruh ki jingpyrta.
Kane ka jingïa-ïaid paidbah jong ki samla pule jong ka Sngap College, Mawkyrwat ka long kum shibynta ban pynsaphriang ïa ka khubor ban ong ‘Em’ ïa u duma uba wanrah shibun ki jingpang ha ka met u briew, ym tang ïa u ne ka nongpyndonkam hynrei wat ïa kiwei de ki bym pyndonkam kumjuh ruh ïa ka mariang.
Ki samla pule ha kane ka sngi ki la rah ruh ïa ki jingthoh ha ki plakat da kaba pyrta da kaba ong, “Dih Duma la sngew kum ki Actor hynrei kim tip pat ba la mong ki Tor”, bam raja la sngewbha briew kum ka Actress hynrei ym tip pat la mong ki bniat, shuh shuh ki la pyrta ruh da kaba ong, “No to Tobacco Yes to Hell”.
Lyngba kane ka jingïa-ïaid, ki samla pule jong ka Sngap Syiem College, Mawkyrwat ki la buh ka jingkyrpad ïa ki para samla pule kiba dang lung ka karta bad kumjuh ïa baroh ki paidbah ba ki dei ban kiar ban dih ïa u duma ne ban bam ïa u raja, khaini bad kiwei de ki jingbam ba sniew namar lada ki dih nr bam ïa ki ka wanrah ïa ka jingpang ba bun jait kum ka jingpang bampong ne Cancer, bad shibun kiwei de ki jingpang kaba ktah ym tang ïa u ne ka nongpyndonkam hynrei ka ktah ruh ïa kiwei de. Namarkata, ki dei ban kiar ban ong, ‘em’ ïa u duma khnang ba kin ïoh ïa ka met kaba koid bad ba khiah bha.
Na ka liang ka Assistant Professor jong ka Commerce Department, ka kong Banrilin Lyngdoh kaba dei ha kajuh ka por kum ka Programme Officer (PO) jong ka National Services Scheme (NSS), Sngap Syiem College, Mawkyrwat, South West Khasi Hills District ka la ong ba ka jingpynlong ïa kane ka jingïa-ïaid paidbah ne rally jong ki samla pule na ka bynta ki Higher Secondary bad na ki NSS Volunteers jong ka Sngap Syiem College ka long kum shibynta ban pynsaphriang ïa ka khubor sha kiwei pat ki briew ba kumno ba kin tip bad sngewthuh ba kin kiar ban dih ne ban bam ïa u duma sla kiba pynsniew bad pynjot ïa ki jingim jong ki briew ha kaba bun na ngi ki briew ngi ïoh ki jingpang ha kiba bun rukom tang na ka daw ba ki briew ki dih bad bam ïa une u Duma sla. Namarkata, ka la buh ka jingkyrpad ryngkat ki jingkyntu ïa baroh ki samla pule bad ïa ki paidbah khlem da jer ïano ïano ba kin ïa snohkti lang ban wanrah ïa ka koid ka khiah da kaba kiar ban ong, “Em Ïa U Duma Sla”.
Ha kane ka sngi la ïa donlang ruh bad ki nonghikai jong ka Sngap Syiem College, Mawkyrwat, South West Khasi Hills District kiba la wan ban ïa synrang lang ha kane ka jingïa-ïaid paidbah jong ki samla pule jong ka Sngap Syiem College, Mawkyrwat.

Leave A Reply

Your email address will not be published.