Nyngkong ka Meghalaya na NE ban don ïa ka Mental Health Policy

0

Shillong, Risaw 10 : Ka Meghalaya ka kylla long ka jylla kaba nynkong eh ha ka thain shatei lam-mihngi jong ka Ri ban don ïa ka State Mental Health and Social Care Policy, ka thong treikam ban peit na ka bynta ka jingsumar kaba paka ïa ki nongshong shnong kiba don ka jingthut ha ka bor pyrkhat.
Ïa kane ka polisi ba dang pynkhreh (draft policy) la pynbna da u Myntri ka tnad ka Koit ka Khiah ka Jylla, James K Sangma ha ka sngi Nyngkong ha ka jingïalang rakhe ïa ka World Mental Health Day.
“Nga sngewkmen ban pyntip ba ka Meghalaya kadei ka jylla kaba nyngkong na ka thain shatei lam mihngi jong ka ri bad ruh lehse ka jylla kaba lai ha ka Ri ban don la ka long ka Mental Health Policy kaban treikam noh tang shu ïoh noh ïa ka jingmynjur ha ka kynhun Myntri,” u la ong haba kren bad ki lad pathai khubor.
Shuh shuh u la ong ruh ba ka jingwan jong ka khlam COVID ka la pynkyndit bynriew ïa ka sorkar jylla ba ka bor pyrkhat kaba khiah krat ka long kaba donkam haduh katta katta kaba donkam kyrkieh ban tuklar mardor.
“Ngi don ka jingkyrmen ba kane ka polisi kan ïarap ïa ka jylla jongngi ban ïakhun ïa kiba bun ki ishu kiba ïadei bad ka jingshah ktah ka bor pyrkhat bad kumno ban lait noh na katei ka jingshah peit ibein ïa kito kiba don ïa kum kitei ki jingshitom. Ngi kyrmen ba kane kan dei ka sienjam kaba paka tam kumno ban pynleit jingmut kham bha shuh shuh na ka bynta kane ka jingsumar,” u bynrap biang.
Shwa kane u Myntri u ong ruh ba ïa katei ka draft policy yn buh ha rynsan paidbah ha kaba ki nongshong shnong ki lah ban ai ki jingkynthoh lane ki jingai jingmut. La pyntip ruh ba ïa katei ka polisi ki lah ban peit da kaba iaid lyngba ka https://meghealth.gov.in/documents.html bad http://nhmmeghalaya.nic.in/programmes/NMHP/nmhp.html kaban don kumba 15 sngi ei ei.

Leave A Reply

Your email address will not be published.