Lada ngi jop ilekshon kam dei ka jingjop jong ngi hynrei jong ka pateng ban wan: Paul Lyngdoh

Shillong, Risaw 10: U Working President jong ka United Democratic Party(UDP) uba dei ruh u MDC jong ka Jaiaw u Bah Paul Lyngdoh u la ong ba lada u jop ilekshon ne U Dr Aman War ha u snem 2023 kam dei ka jingjop jong ki hynrei ka dei ka jingjop hi jong ka pateng ban wan namar ma ki lei ka rta jingim kaba kin im ha sla pyrthei kam da jlan shuh, ïa kane u la kren ha ka jingïalang pynkshem ïa ki nongkitkam ka UDP Women’s Wing 17-North Shillong bad ka jingpdiang sngewbha ïa ki samla kiba pynïasoh sha ka UDP Youth Wing jong kane hi ka constituency ha ka sngi Nyngkong.
Haba kren ha kane ka sngi U Bah Paul u la khot la wer ïa ki paidbah ka jylla baroh ba kin kyndit thiah noh ka jingjied nongmihkhmat hynrei ba kin jied noh ïa ki nongthaw aiñ kiba kren ïa ka khia ka shon bad ka jingdonkam jong ka mynta khlem da leh klet pat ban buh ha khmat ïa ka jingdonkam ka lawei ban dang wan ki longdien.
“Lada phim kyndit thiah noh mynta ki juh ki kti ba tap kti ba phi ïoh pisa mynta kin dei ruh ki juh ki kti ban thap shyllang ha ki khyndiat tylli ki snem ban wan” u la ong.
Haba kren halor ka jingkyrduh nongïalam jong ka jaidbynriew u Bah Paul u la ong, “Ki don ki Khasi ha kiwei ki bynta ka pyrthei kum ha United Kingdom, ha Bangladesh, ha Assam, Tripura bad ki katto katne ki bynta ka ri hynrei wat mut ba kin lah ban sei nongïalam na kitei ki jaka lada ma ngi nangne kaba dei ka tynrai ki saiñ pyrkhat ka jaidbynriew ngi fail.”
U la ong ruh ba kum ka party kan pynthikna ba na Mawlai, Mawprem, Mawkhar kan ïoh ïa ka jingjop lymkumta ka lawei ka jaidbynriew ka la jot syndon thiaw.
“Kane ka kynti ka dei ba ngin shna ne pynpra ïa ka jaidbynriew bad ka dei ka por ba ngin thaw ïa ka pakit ne ngin long tang ka pakit, na kata ka daw ka dei ka deiti jong ngi baroh ban shim jingkit khlieh ïa kane. Lada phim trei shitom ban jop ka pateng lyngbaa jong ngi wat wan wan Bah Paul ne Dr Aman shuh” u la ong.
Ha kane ka sngi la ïoh jingkren ruh na ka Kong Margaret Khyriem, u Dr Aman War uba dei u kyrtong ka UDP na katei ka Constituency, u Bah Alanntry F Dkhar bad kiwei pat ki nongïalam ka party