Dei ha ka por long Myntri u bah JA Lyngdoh ba ïoh kiew kyrdan kloi ki doktor Specialist

Shillong, Risaw 10 : U Myntri barim ka sorkar jylla, Bah JA Lyngdoh u la pynkynmaw ba ïa ka ishu kaba ïadei bad ka hok jong ki doktor Specialist ba kin kiew kyrdan ha kino kino ki kam ba lait kadei ha ka por jong u kum u Myntri hapoh ka jingïalam jong u (L) BB Lyngdoh kum u Myntri Rangbah ka jylla.
U la ïathuh ruh ba ha ka por ba u jop ha u snem 1988 u la shah jied kum u Myntri Khynnah ban ïarap lang ïa u (L) Dr. Donkupar Roy uba bat ha katei ka por kum u Myntri ka Koit ka Khiah ka sorkar jylla.
U la ong ruh ba u Myntri Rangbah ha kitei ki por u la kyntu ïa u ban pyntikna ba kan ym don satia kano kano ka jingïaknieh hapdeng ki doktor (general doctor) bad ki doktor specialist.
Utei u rangbah ba dei ruh u MLA ba la jop lai sien na Nongspung constituency u la ïathuh ruh ba la pyntip sha u Dr. Donkupar Roy ha katei ka por ba u kwah ban shim ïa ka ishu kaba ïadei bad ki doktor specialist namar ka Meghalaya Medical Services Association (MMSA) hapoh ka jingïalam jong u DHS barim, Dr. Aman War kum u General Secretary u la pryshah ïa ka jingkyntiew kyrdan ïa ki doktor specialist haba don kino kino ki kam kiba lait.
Lah ruh ban kdew hangne ba u Bah JA Lyngdoh kumjuh u Dr. Aman War ki dei ki kyrtong kiba pynkhreh ban aireng mynta na North Shillong ha kane ka elekshon MLA kaban long ha u 2023. Tangba u Bah Lyngdoh u thmu ban aireng na tiket Congress kaba u wan ban ïasoh biang hadien ba u la ieh ïa ka BJP katba u Dr. War pat un ïakhun na ka UDP pyrshah ïa u MLA ba mynta Bah Adelbert Nongrum.
U Bah Lyngdoh u la ïathuh ruh ba ula khot ïa ki (MMSA) sha kamra ban ïa kren bad ki bad ruh ban buh jingkylli halor ka jingpyrshah jong ki ban kyntiew kyrdan ïa ki doktor specialist. U la ong ruh ba u la kylli ïa ka jingiapher hapdeng ki doktor general bad ki doktor specialist ha kaba na ka liang u Dr. Aman u ong ba ki dei kijuh.
“Nga la ong ba kim dei ki kijuh namar ha ka jingpule hadien saw snem ka jingpule doktor ki specialist doktor ki hap ban pule biang sa arsnem kumta nga la ong ïa ki kumno kan dei kajuh. Kumta nga la rai ban pyntikna ba dei ban mang katto katne persent na ka bynta ki specialist ban ailad ïa ki ban kiew kyrdan,” u la ïathuh.
U ong ruh ba hangtei hi u la bthah ïa u Commissioner ban pyntikna ban pynmih noh ïa ka jingpynbna mardor ba la mang katto katne persen na ka bynta ki doktor specialist ban ïoh kiew kyrdan hadien ba don ka kam kaba lait.
La ïathuh ruh ba ha katei ka por ki MMSA ki la byrngem ban ïakhih hynrei hadien ba la pynsngewthuh ki la weng noh bad kumta ka jingmang katto katne persen na ka bynta ki specialist ka la long. “Katei kadei ka sngi kaba kmen tam na ka bynta jongnga,”u la ong.