Ka elekshon ha Sohïong lehse kadei kawei na ki rynsan ba ka NPP ka la syllad tyngeh ïa ki nongïalam ka UDP ha kaba la poi ruh haduh u pud ba ki nongïalam ka NPP ki la byrngem ban pynhiar noh na ka bos Meeghalaya Democratic Alliance ne ban weng noh na ka sorkar. Ka NPP lada ka nud shisha lehse kan hap ruh ban pyrkhat 100 sien namar ïoh kumno re kumno ym lah ban tip ba ha ka sainpyrthei ïa ka bym lah ban long ruh ka lah ban long. Kawei ruh ka NPP kadei ban kynmaw ba lada ka Congress kaba don 17 ngut ki MLA ka poi haduh u pud ba kan sah nod ha shwa ka elekshon, kumta ruh kan ym da pher than ïa katei ka party ruh lada leh khyllew than.
Kum kawei na ki party ba la ïoh ïa ka jingithuh ha ka Election Commision jong ka Ri kum kata ka National party kadei ruh ban pyrshang katba lah ba ha shwa ba kin weng noh ïa ka UDP ka dei ban pynkhlaiñ shwa ïa ka sem lajong namar katba ym pat lah ban pyndap pura na sem lajong ban thaw sorkar ka dang long kaba eh ban shaniah ha kiwei pat ki party ban pynskhem ïa ka bor sorkar. Ha kajuh ka por lah ruh ban kdew ba haduh mynta hi ka NPP ka don tang 28 ngut ki MLA bad lada jop sa na Sohïong ka lah ban kiew sha ka 29 ngut. Hangne ruh ka NPP ka dang donkam ïa ka jingkyrshan jong kiwei ki party ban pynskhem ïa ka sorkar khamtam ïa ka BJP bad ïa KA HSPDP.
Kawei pat ka bynta ka long ba kum ka UDP hi kam dei ban shu shah jem katba kren ki nongïalam ka NPP hynrei kadei ban pyni kum ka party kaba jop haduh 11 ngut ba kan pyni ïa ka main rangbah ym ban shu shah ñiew ba ki shu sdien sah ha ka bos jong ka MDA. Lada jïa ba ka UDP ka nud shisha ban pynibor ka sorkar kan khihwin bad ka lah ruh ban poi haduh u pud ba ka sorkar kan khyllem hynrei lada ka pynjem bad ïai bteng ban pynrit
Lada jia kumno re kumno ka NPP ka leh bakla bad lada kiwei ki party ki tylli lang kan ym don jingeh ïa kane ka party ba mynta ban don ha ka Liang Pyrshah watla da ki don 29 ngut ruh. Hynrei kane ruh ba kan urlong ka eh bha namar da ka long kumno kumno ruh ka BJP kaba don arngut ki MLA kan ym lah ban treilang bad ka TMC lane bad ka Congress. Tangba ha kane ka bynta ruh ym lah satia ban tip ba ha ka sainpyrthei ïoh ka lah ban long ruh.
Tangba na kaei kaba paw lada jia ba ka NPP ka dang lah shisha ba kan khring shuh ïa ki MLA na kiwei ki party ha kine ki khyndiat bnai ban wan kan buh ïa ki party ba treilang ha ka khim khait bad kan pynlong ïa ki ban hap shong pyneh jubor ne sdien haduh ba kut ka san snem ha ka sorkar.
Lah ruh ban ong ba ka lynti ïaid ha ka sainpyrthei ka dang bun bha ha kine ki saw snem 10 bnai ki dang bun bha ki jingkylla kiba lah ban pynkylla dur kylla dar bad wat ban pynkylla khongpong ïa ka sainpyrthei. Hynrei kine ruh kin jia tang lada ki party heh ne ki National party ki sdang ïa ka jingkhring briew sha la ki party party jong ki.
Ka jingsdang jong ka jingkylla ka sainpyrthei kan sdang shwa na kane ka elekshon MDC kaban long ha ki sdang snem jong u 2023. Lada jia shisha ba ka lyer Voice of the People Party ka trei borbah ha kane ka elekshon lehse kan dei kawei pat ka jingkhih phaloh kaba jur bha ha ka jylla khamtam eh ha ki constituency jong ka Rilum Khasi bad Jaintia. Tangba ha kane ka bynta ruh ym lah ban shaniah khamtam haba ki MDC kim ngat ha ka ain kyntiap seng bad kumta ki lah ban kynthih ne ban pynïasoh bad kano kano ka kynhun ne party kaba ki mon khlem da don kano ka jingteh.
