“Ngin pyrshang biang mynta ban pynkhreh pynlong ïa ka National Games ha u 2025 : Shakliar Warjri

Shillong, Jymmang 11 : U Myntri badei peit ïa ki kam ïalehkai jong ka Sorkar Jylla, u Bah Shakliar Warjir u la ong ba ka Sorkar Jylla ka la pynkhreh biang mynta ban pynlong ïa kawei na ki lympung jingïalehkai ba hehduh hapoh ka ri India ka National Games ha u 2025.
“Ka Sorkar Jylla mynta kan pyrshang biang ban ïoh pynlong ïa ka National Games hapoh u Lber 2025,” ong u Bah Shakliar uba dei ruh u Presidennt ka MSOA haba kren sha ki nongthoh khubor hadien ba la wai ka Annual General Meeting jong ka Meghalaya State Olympic Association (MSOA) ha ka janmiet sngi Palei ha Polo Towers.
Ha kane ka jingïalang kaba shisien shi snem, ka Meghalaya State Olympic Association (MSOA) ka la ïoh ban ïatai ïa ki 10 tylli ki mat kaba kynthup ka jingpynkhreh na ka bynta ban pynlong ïa ka National Games ha u 2025, ka jingwanrah ïa ki kaiphod treikam jong ka, ka jingjied ïa u auditor na ka bynta ka samoi 2023-24 nalor kiwei kiwei.
U Myntri u la ong ruh ba halor katei ka mat ban pynkreh ïa ka National Games, kin sa wanrah biang ha ki jingïalang ban peit bniah biang ïa ki jingdonkam baroh. Ha ka jingshisha ka Meghalaya ka la dei ban pynlong ïa ka National Games ha u 2022 kaba dei ruh ka jingrakhe dap 50 snem ka jingïoh la ka jong ka Jylla kaba pura, hynrei kam shym la ïoh lad ban pynlong.
“Ngim donkam shuh ban dang thep kyrteng ban ïoh pynlong ïa ka National Games namar ba ngi lah dep shisien hynrei ki don kiwei pat ki jylla kiba hap ban pynlong shuwa ma ki bad ynda ki la dep kan sa dei sa ka pali ka jong ngi,” la ong u Myntri.
La sngewthuh ba lada urlong ka jingthmu jong ka sorkar jylla ha ryngkat ka MSOA ban pynlong ïa ka National Games ha u 2025, ka jingkyrkhu bad ka jingmyntoi kan long na ka bynta ki khynnah, ki samla bad kito kiba don ka sap ïalehkai ba kin ïoh ban pynpaw pyrthei ïa ka sap ka jong ki.
Hynrei ym baroh ki synjuk ïalehkai kin ïoh ban ïashim bynta, ki don ki katto katne ki synjuk ïalehkai kibym hap ha ki jingïalehkai Olympic (non-olympic sports) kum ka Arm Wrestling, Muaythai bad kiwei kiwei. Haba kylli na u Myntri la ka sorkar jylla ka ju don ne em ka jingïarap na ka bynta jong ki haba ki leit ban ïashim bynta ha ki jingïalehkai shabar na la ka jong ka jylla lane sha bar ri.
Na ka liang u Myntri u la ong ba na ka liang ka Sorkar Jylla ka ju ai jingïarap na ka bynta jong ki. “Ka Sorkar Jylla ka ju ai jingïarap na ka bynta jong kito ki kynhun kibym hap ha ka Olympic, ha kabaa ka do kawei synjuk ïalehkai Muaythai ha ka jingleit ïalehkai sha Thailand, na ka liang jong ngi ka Sorkar ngi la ai ka jingïarap,” ong u Bah Shakliar da kaba bynrap ba ka Sorkar ka pyrshang beit ban ïarap kat kaba ki lah.
Halor ki jingbit jingbiang jong ki jaka ïalehkai ha ki ar tylli ki district kata ha Ri-Bhoi bad ha West Jaiñtia, u Myntri u la ong ba ka Sorkar mynta kan sa ai mar kawei ka Athletic track ha kitei ki ar tylli ki district.