25 tylli ki kynhun ban ïashim bynta ha ka MSL 2023, 5 lak ïa ka Champion bad 3 lak ïa kaba wan ba ar

Jowai, Jymmang 11 : Ïa ka lympung ïalehkai phutbol ba heh duh hapoh ka jylla kaba la tip kum ka Meghalaya State Leaque (MSL) 2023, kan sa sdang noh lashai ka sngi 12 tarik ha madan Kiang Nangbah Stadium Jowai, ha kaba u myntri ka Sports & Youth Affairs ka sorkar jylla u bah Shakliar Warjri un wan ban plie pyrda ïa ka ha ryngkat ka jingdonlang u MLA ka thaiñ ma Wailadmiki Shylla.
Na ka liang u ma Lammat-oo Laloo Hony. General Secretary ka West Jaiñtia Hills District ha ka jingkren sha ki lad pathai khubor ula ïathuh ba ka Association kala pyrshang ban pynkhreh ïa ki jingdonkam jong ki ragïalehkai bad u kyrmen skhem ba kane ka lympung kan long kaba ïaid beit ïaidryntih da ka jingïatreilang jong baroh.
Ban pynbyrnia shuh shuh ïa kane ka lympung kin don ki jingtem ba bun jait kum ki DJ bad kiwei de, u kyrmen ba lyngba kane ka lympung yn sa lah ban ban sei ïa ki rangïalehkai kiba don shisha ïa ka sap ka phong ha ka liang ka phutbol.
Kine ki ar kynhun ki ban ïakhun lashai ka sngi 12 tarik kin long ka Ñiaw Wasa FC pyrshah ïa ka Rangdajied Utd FC ha ka por 3 baje nohphai sngi bad na ka liang ki Captain na baroh ar kynhun kila thrang shisha ban mih madan ban ïakhun bad ban ïoh ïa ka jingjop. Ha ka juh ka por kila pynpaw ka jingsngewkmen ban ïoh ïashim bynta sa shisien ha kane ka MSL hadien ki snem ba wan lynshop ka Covid-19.
Katba na ka liang u Former CEO ka MFA bad Adviser bah Arki Nongrum ula ong ba kane ka dei ka sien kaba ar ha Jowai ban pynlong ïa kane ka lympung ïalehkai MSL, ula ong ruh ba ka jingpynkhreh ïa kane kala long kaba ïaid beit shait shait, ïa kane ka lynpung yn pynïalehkai ïa ka ha ki saw jaka kata ha Jowai, Shillong, Mawkyrwat bad ha Tura.
Ula ong ba ki don haduh 25 tylli ki kynhun kiba ban ïakhun ha kane ka lympung MSL napdeng kine 19 tylli ki kynhun kiba dei ki Champion jong ki Association bad 6 tylli kiba wan ba ar (Second Place) bad ka jingïakhun phainal kan long beit ha Nongbah Shillong ha u bnai June.
Ula pyntip ba ïa kane ka lympung la ïarap da ka sorkar Jylla lyngba ka tnad Directorate Sports & Youth Affair, na ka bynta ka kynhun kaba jop ha kane ka lympung kan ïoh rong haduh 5 lak tyngka lem bad ka trophy ba heh bad ka kynhun ba wan ba ar kan long 3 lak tyngka ryngkat ka trophy.
Shuh shuh ula ong ba ka thong jong kane ka MSL ka long ban ai lad ïa ki rangïalehkai ba kin kiew shaphmat ha ka jingïalehkai phutbol namar kiba bun hi ki rangïalehkai ki mih na kine ki thaiñ Jaiñtia bad Ri-bhoi District, ula ong ruh na kane ka lympung MSL kila don ruh ki rangïalehkai kiba leit ïalehkai mynta sha ka I-League (2 Division), na ka liang ka MSL kan ïaleh shitom ba une u snem ba thymmai kan don sa ka MSL Youth League, Women League bad Baby League nalor kiwei de.