Nongstoiñ, Naiwieng 30: Kum ka jingïasnohkti bad ban ïadon bynta lang bad ki para briew kiba donkam ïa ka jingïarap, ka synjuk jong ki samla jong ka thaiñ Nongstoiñ kaba la tip kum ‘Ka Kynhun Iarap Ia Kiba Donkam Eh’ ba la ïalam da u bah Lumlang Kharsyiemlieh bad u bah S.Marbañiang, mynta ka sngi balang ka 30 tarik Naiwieng, ka la leit ban jngoh ïa ka Rev S Wollington Children’s Home, ka jaka ri khunswet kaba la pynïaid da ka Khasi Jaintia Presbyterian Synod Sepngi, kaba don ha ka shnong Nongpyndeng.
Katei ka synjuk ha katei ka jingleit jngoh ïa katei ka Children Home, ka la noh synñiang ruh da ki jaiñ siang thiah bad ki syngkhlieh na ka bynta ki 26 ngut ki khynnah kiba don ha katei ka Children’s Home. Shuwa ban ai ïa kitei ki jingai sngewbha, la ïoh ïa ka jingkren lyngkot na u bah Lumlang Kharsyiemlieh, ha kaba u la pynshai ba ka thong ba ka synjuk ka la buh kum ka Motto ka long “To hikai ïa ka ban leh bha”, kaba la pynshong nongrim na ka Bible kaba la thoh ha ka Kitab u Isaiah Lynnong 1 dkhot 17. La ïoh ruh ïa ka jingduwai na uwei na ki dkhot jong ka Synjuk uba dei na ka Jingïaseng Samla Nongkhlaw District.
U bah Kharsyiemlieh haba ai jingkren ha katei ka sngi u la kyntu ïa ki 26 ngut ki khynnah shynrang bad kynthei kiba sah ha katei ka jaka sumar, ba ki dei ban kynmaw ba kine ki sngi ki dei ki sngi kiba eh bad kiba jynjar haduh katta katta, namar ki bor jong kane ka pyrthei ki ïaleh ban pynngop ha kiba bun jait ki jingsniew. Namar lada bakla ka lawei jong ki khynnah lane ki samla kan shu sep ei bad ka long ka bym lar kam haei haei ruh.
U la ong ruh ba ki khynnah kiba dang khie samla ki dei ban long ki jingshai ïa kiwei pat da kaba pynkynmaw ïa ki dkhot na ka Bible kaba ong, “Phi phi long ka jingshai ka pyrthei ym lah ban buh rieh ïa ka shnong kaba la buh halor u lum, lymne kim ju thang thang ïa ka sharak bad buh hapoh ka shang hynrei ha ka dieng pynïeng sharak”.
Na ka liang ka kong Suklinshisha Paliar kaba dei ka Superintendent jong katei ka children home, ka la pynsngew ba ki khynnah kiba sah ha katei ka jaka sumar ki don 15 ngut ki shynrang bad 11 ngut ki kynthei. Hynrei ki sah ha la ka jong ka jong ka jaka sah. Nalor nangta ka la pynsngew ruh ba baroh 26 ngut ki leit skul bad ki don naduh klass III haduh ka klass kaba 11. Khatduh eh na ka liang ka KKIIKDE, ka la aiti ïa kitei ki jingai sngewbha sha ka kong Suklinshisha ba kan peit kumno ban pyndonkam ïa ki.
