Nongstoiñ, Naiwieng 30: Kawei ka ïing jong I kong Phlaisibon Puweiñ ba shong ba sah ha ka shnong Siejlieh Nongstoiñ West Khasi Hills District, ka la shah bam duh ha ka ding ha kaba katei ka longïing ka la duh ei baroh ki jingdon jingem kiba ki don hapoh ïing.
Katkum ka jingïathuh jong ka kong Phlaisibon, la ong ba mynta mynstep ha ka por kumba 10 baje katba ka dang don kham pajih na la ïing ban leit thied jingthied na ki dukan shnong, kyndit kynsan la don ba pyntip ba ka ïing jong ka ka la kem ding. Da ka jingwan poi ka kali pynlip ding la lah ban tem noh shi syndon ïa ka ding shwa ba kan pur shawei pat. La ong ruh ba ïa ka daw jong ka jingpluh, ym shym la lah ban tip haba ka light kam shym la don mynta la bun bun sngi. Nalor kata ruh khlem don ba sliew ding wat ka shawla ruh ka dei kaba la pynlip shuwa ban leit dukan.
Hynrei, ha kane ka jingjia shibun ki mar kiba kordor ki la duh ei khamtam ka pisa kaba kumba 10 hajar tyngka ei ei bad haduh 9 jur ki soh skhor ksiar ki la ing lang. Ym tang katta hynrei la ong ruh ba ki kot pule jong ki khun ruh ki la ing bad la shem jingeh shibun, namar don ki khun kiba dang sdang eksamin naduh mynta ka sngi. Watla la katta ha katei ka jingjia ym shym la don mano mano ruh ba mynsaw namar baroh ki khun ki la leit skul.
Ka Seng Samla Pdengshnong Siejlieh hapoh ka jingïalam jong u President u samla Kitbor Kharsyntiew ka la leit ban sngew lem da kaba iarap pisa khyndiat kynsoit ban sah ki lanot.
