Balei ka JHADC ka shu sngap mynthi ïa ka jingjia ha Mukroh?

0

K a jingshah siat ïap jong ki phra ngut ki nongshong shnong Pnar ha ka shnong Mukroh ha ka step jong ka 22 tarik u Naiwieng, 2022 ha ki nongap pahara khlaw bad ki Pulit ka Jylla Assam ka la pynkyndit lut ïa ki nongshong shnong jong ka Jylla Meghalaya baroh kawei. Kane la jia tang hadien 12 snem tam ba ki Pulit Assam ki la siat ïap ïa ki saw ngut ki rangbah Khasi ha ka shnong Langpih ha u bnai Jymmang, 2010. Kane ka jingjia ha ka shnong Mukroh ka la pynbitar lep ïa ki paidbah ka Jylla Maghalaya namarba ka sohkhliang kaba la jia ha Langpih ruh kam pat dam.
Watla ka jinglong jingman ha nongbah Shillong ka la thanda hi jai bad ka leit ka wan, ka khih ka kamai la sdang ban ïaid beit kumba ju long hynrei kyndit kynsan sa u Chief Executive Member (CEM) jong ka Karbi Anglong Autonomous Council (KAAC) u Tuliram Ronghang u la ber mluh pynban ïa ka jingmong ha ka jingleit jngoh ïa ka jaka ba u nongap pahara khlaw ka Beat Forest jong ka Jylla Assam bad ki san ngut ki Pnar ki la kyllon ïap da kaba kam nongkynti ba ka shnong Mukroh ka dei kaba dang hap shapoh u pud u sam jong ka Karbi Anglong District jong ka Jylla Assam. Kaba kham pynsat bad pynbitar leilei ïa ki paidbah ka dei ka jingkren laplah jong u Tuliram Rongham ba ki Pnar kiba sah ha ka shnong Mukroh ki dei tang ki mynder poiei kiba shu sah be-aiñ.
Ym tang katta, wat ka jingpynbna jong u CEM ka KAAC ban tei ïa u mot sah kynmaw ïa u Bidyasing Lekhte u nongap pahara khlaw jong ka tnat Khlaw ka Jylla Assam bad ban tei ïa skul ha ka shnong Mukroh ka la nang pynmehding shuh shuh ïa ki paidbah ka jylla Meghalaya.
Kat hapdeng kane ka saw ka sian, baroh ki khmat ki phai sha ka Jaiñtia Hills Autonomous District Council (JHADC) kaba long ka nongri nongkdup ïa ka khyndew ka shyiap katkum ba la pynkup bor da ka riti synshar ka Ri India, pynban katkum ka jingïoh jingtip, u Chief Executive Member (CEM) jong ka Jaiñtia Hills Autonomous District Council (JHADC) u Bah Thombor Shiwat bad ki Executive Member (EM) ki jong u, haduh mynta kim pat leit iuhkjat satia ha ka shnong Mukroh naduh ba la jia ka jingshah siat ïap ki san ngut ha ka 22 tarik u Naiwieng 2022.
Na ki 30 ngut ki MDC jong ka Council, dei tang u MDC ka Mookaïaw Constituency u Bah Winning Garland Sungoh bad u MDC ka Barato Constitueny kiba don ha syndah jong ki paidbah ka shnong Mukroh naduh ka sngi nyngkong ba la jia ka jingshah siat ïap ki san ngut ki riewpaidbah ba luilui.
Baroh ki jingkylli mynta ki mih balei u CEM ka JHADC bad ki EM jong u kim don mynsiem wat tang khyndiat ruh ban leit hiar sha ka shnong Mukroh katba u mynder uba nabar ka jylla u CEM ka Karbi Anglong Autonomous Council (KAAC) u kloi ban leit hiar hi dalade sha ka shnong Mukroh kaba shu kyntur pud be-aiñ da ka Jylla Assam ban kam trai syndon wat ïa ka shnong Mukroh.
Kane ka jingbym shim jingkitkhlieh jong u CEM ka JHADC ka pynpaw ba kum u nongsynshar uba la shah pynkup bor ha ki paidbah um salia eiei ruh em ban ïada ïa ka khyndew ka shyiap kiba hap hapoh u pud u sam jong ka District Council hynrei un shu long tang u si sam khmut ban shu shah pynïaid hano re hano.
Katkum ka jingïathuh jong u Waheh Shnong ka shnong Mukroh u Bah Hamboide Sumer ka shnong Mukroh ka dei kaba dang hap hapoh ka West Jaiñtia Hills District jong ka Jylla Meghalaya bad katkum ka Map ba la ai da ka Jaiñtia Hills Autonomous District Council ha u snem 1968 ka pynshisha ba kane ka shnong ka dei kaba hap hapoh u pud u sam jong ka Jylla Meghalaya katba ka Sorkar Assam ka dang kam trai ïa ka shnong Mukroh dang katto katne snem.
Kum kine ki jingjia ki ju wan jia bad kin dang bteng ruh ban ïai jia ha ki shnong kiba don ha khappud lada ka Sorkar Meghalaya kan dang ailad ïa ka Sorkar Assam ban ïai kyntur sha u pud u sam jong ka Jylla Meghalaya. Lada ym lah satia ban ïa pynbeit noh ïa u pud u sam bad ka Jylla Assam, ki jyrwit jyrwat kin nang ïai jia na uwei u snem sha uwei pat.

Leave A Reply

Your email address will not be published.