Yn pynlong ka MAA bad MSOA ïa ka Sohra International Half Marathon 2022
T. 1.5 Lak ïa kiba jop nyngkong bad T. 1 Lak ba wan ba ar
Shillong, Naiwieng 30 : Ka MeghalayaAtheltics Association (MAA) ha ryngkat ka Meghalaya State Olympic Association (MSOA) kan sa pynlong ïa ka jingmareh marathon kaba la tip kum ka Sohra International Half Marathon 2022 ba 10km ha ka 21 tarik u Nohprah 2022 ha Mawkdok.
Ïa katei ka marathon yn pynlong da ka jingkyrshan lang ka tnad Directorate of Sports and Youth Affairs jong ka sorkar Jylla ha kaba ka khusnam song pisa na bynta baroh ki nongjop kan long T. 10.10 Lak.
Haba pynbna ïa kane ka jingpynmareh marathon ha Shillong Press Club hynne ka sngi Balang, u Bah John F Kharshiing Working President ka MSOA bad u Bah Finely L Pariat General Secretary ka MAA bad jong ka MSOA, ki la ïathuh ba ïa ka jingmareh yn pynlong ha Mawkdok bad ka jingjngai kan long 10 km.
Ki la ïathuh ruh ba ha katei ka jingmareh marathon kin don ruh kiba na kiwei pat ki ri kiban ïashim bynta bad la phiah ïa ka jingmareh marathon ha ki saw tylli ki kyrdan ha ryngkat ka bai rung.
Ki saw tylli ki kyrdan ïakop ki kynthup ïa ka Elite Group ka bai rung ka long 500 tyngka marwei, ka kyrdan ïakop tang na bynta ki nongïalehkai kiba dei napoh ka jylla Meghalaya ka bai rung ka long 200 ryngkat, nangta ka kyrdan kiba 50 snem sha jrong (A-50 years) bad ka kyrdan Run for Fun, ka bai rung jong baroh ar tylli kitei ki kyrdan ka long 200 tyngka marwei.
La ïathuh ruh ba ki nongïashim bynta ki lah ban pynrung kyrteng ïalade lyngba ka online bad ka offline bad ka tarik ba khatduh ban pdiang kan long ha ka 18 tarik Nohprah. Ki la ïathuh ruh ba ïa kane ka Sohra International Half Marathon 2022 kadei kaba la ithuh da ka Athletic Federation of India bad ba la kyrshan pisa da ka tnad sports jong ka sorkar jylla.
Ki song pisa ba ka MAA bad MSOA ki la pynkhreh ki long T. 150000 ïa kiba jop kyrdan ba nyngkong, T.100000 ïa kiba wan ba ar, T. 50000 ba wan ba lai, T. 40000 ba wan ba saw bad T. 20000 ba wan ha ka kyrdan ba san.
Katei ka jingmareh kadei ruh ka jingknieh ïa ka World Record ha kaba ki nongmareh kin hap ban pyndep ïa ka jingmareh hapoh ka ar kynta ba la buh. Kat haduh mynta ïa ka world record jong ka Half Martahon kadei 57:31 second ba la bat da u Jacob Kiplimo jong ka Uganda.