Ha u DC ujor ki saw seng ïa ka jingtrei torti ïa ka surok Mawduh-Nongkhnum

Nongstoiñ, Naiwieng 30: Ki nongïalam jong ki saw sengbhalang ba kynthup ïa ka seng MYF, WKSU, UHM bad WYF, ki la leit ban ai jingthoh bad ujor syndon hakhmat u Deputy Commissioner ka West Khasi Hills, da kaba pynpaw ka jingsngewkhia kaba jur namar ka rukom pyntrei ïa katei ka surok kaba na Mawduh ter ter shaduh jan Dewlynnong Nongkhnum, ka long kaba torti haduh katta katta bad kaba la thikna bha ba tang katno katne por katei ka surok kan pra bad ka jingduhnong kan long ïa ki paidbah nongshong shnong jong ka thaiñ.
Lah ban kdew hangne ba ha ka 19 tarik mynta u bnai Naiwieng, ki nongïalam jong ki saw seng hadien ba ki la ïoh ïa ka jingujor jong ki paidbah, ki la leit ban jurip dalade bad lap ïa ka jingshisha ba ka tukom pyntrei ïa katei ka surok, ka long kaba torti sha ba palat bad kam shym long satia katkum ka rukom ba dei ban sïang rong, hynrei la shu trei tang dep.
Lah ban pynkynmaw ruh ba shwa ban leit jurip, ki nongïalam jong ki saw seng ki la leit ban ïakren ïakynduh ïa u Executive Engineer bad SDO ka tnad PWD ® halor ka jingleh torti jong u Contractor. Hynrei, kumba long haduh mynta hi imat u EE bad ki heh ki haiñ kim shym la nud ban leh ei ei, lym kumta balei ka jingpyntrei ïa katei ka surok ka dang bteng beit watla hapdeng ka jingud jingkynthoh ki paidbah.
Na ka liang ki nongïalam jong ki sengbhalang ba kynthup ïa u Bah Hamar Lyngkhoi President ka seng Meghalaya Youth Federation, Bah Moonstar Nongrem President United Hynñiewtrep Movement West Khasi Hills, Bah Despitol Sun President West Khasi Students Union bad Bah Don Marweiñ President Western Youth Federation, ki la kyntu ïa u Deputy Commissioner ba un shimkhia halor kane ka bynta, khnang ba ka jingsiang rong kan long shisha ka jingmyntoi ïa ki paidbah.
Kumba long mynta ka rukom siang rong ka shu long tang ban pyndep rukom bad lada ka long kumne, kan long ka jingduhnong kaba khraw ïa ki paidbah nongshong shnong bad ïa baroh hi, namar baroh ki kwah ïa ka surok kaba skhem bad kaba neh slem nalor ba ka dei artad ka surok ban leit sha ka jaka jngohkai ba pawnam ha ka Jylla, ka Dewlynnong Nongkhnum.
Ki nongïalam jong ki saw seng ha ka kyrwoh khubor ba ki la phah mynta ka sngi sha u nongthoh khubor, ki la byrthen ruh ba lada donkam kim banse ban leit sha kiwei pat ki bor ba kham halor ba kin shim kam halor kane ka bynta. Hynrei, tad haduh kata ka por na ka liang ki saw seng kin ap peit shuwa aiu ka tnad PWD bad u DC kin leh ïa kane ka jingtrei torti ïa katei ka surok.