Jop u Jimwellson Ramsiej bad ka Lyntijingkyrmen Kharjahrin ha ka ‘Sngap Syiem Day Run for Fun 2022’

Mawkyrwat, ‘Naiwieng 30: U Jimwellson Ramsiej bad ka Lyntijingkyrmen Kharjahrin ki la long ki ar ngut kiba la wan shakhmat ha ka lympung jong ka jingïakop mareh thong jong ka ‘Sngap Syiem Day Run for Fun 2022’ ba la pynïaid da ka Hynñiewtrep Youths Council (HYC) jong ka South West Khasi Hills District ha Mawkyrwat.
Kane ka jingïakop mareh thong ka long kum shibynta jong ka jingrakhe ïa ka lyngkhuh sngi kaba 174 jong uwei u Syiem ba khraw jong ka Hima Maharam kata u Sngap Sing Syiem ha kaba ïa ka jingmareh la sdang na lad CHC Mawkyrwat bad la pynkut hapoh ka Phyllaw jong ka Circuit House kaba don ïa u mot sah nam jong u une u syiem ha Laitlawsang.
Kiwei pat ki nongjop ha kane ka sngi ki long u Pynhunlang Kharwanniang, u Richardmexson Ramsiej kiba dei jong ki khynnah shynran. Nangta, ka Eljidary Wartde bad ka Lari-janai Wartde kiba dei ki nongjop jong ki khynnah kynthei.
Ha kane ka sngi ka don ruh ki khusnam kyrpang na ka bynta ki 5 ngut ïa ki khynnah shynrang ba kynthup ïa u Bestfulson Ramsiej, u Badapbiang Sangma, u Ridaphi Waishei, u Jameperter Kharwanniang bad u Banteithymmai Kharjahrih bad 3 ngut ïa ki khynnah kynthei ki long ka Kyntimery Ramsiej, ka Teilyntishisha Ramsiej bad ka Lahunmynsiem Ramsiej.
Kiba ïadonlang ha kane sngi ki long u Wallambor Nongsiej, President ka HYC Mawkyrwat Circle, u Kyrpang Lyngdoh, Assistant Secretary ka HYC Mawkyrwat Circle bad u T. Thyrniang.