Noh synñiang ka Bank of India ïa ka Shnong Mawlynnong

0

Shillong, K’lyngkot 16: Ka Bank of India ha ka 11 tarik mynta u bnai, ka la hiar sha ka Shnong Mawlynnong, ka shnong ba khuid tam ha Asia ban leit jngoh ïa kane ka Shnong bad ban ai sngewbha ruh da ki jaka theh ñiut ne ki dusbin bad ki sopti phong ba shet jingshet ne ki apron sha ki paidbah jong ka Shnong.
Ïa kine ki jingïarap ba la ai lyngba ka skim CSR la sam da u AK Das, uba long u MD jong ka Bank ryngkat ka jingïadon lang u General Manager (NBG-East) u Manoj Kumar Singh, nangta u Zonal Manager, u Ramesh Kumar bad kiwei kiwei ki ophisar bad nongtrei jong ka Bank.
U Das haba kren ha ka jingïalang ryngkat ka jingïadon lang u Rangbah Shnong bad ki paidbah, u la pynpaw ka jingsngewkmen ba u lah ban poi sha kane ka Shnong kaba la ïoh ïa ka nam ka burom namar ka jingkhuid jong ka. “Nga da sngew sarong ba ha ka ri jong ngi, ka don kaba kum kane ka Shnong kaba pawnam namar ka jingkhhuid jong ka”, la ong u MD. U la ïaroh ïa ki nongshongshnong namar ka jingtrei shitom jong ki ban wanrah ïa ka jingkhuid bad u la ong ruh ba kane ka jingnoh synñiang jong ki ka long ban nang ïarap bad pynshlur ïa ka jingtrei shitom ha ka liang ka jingkhuid jingsuba.
Lah ban kdew hangne ba ka Shnong Mawlynnong kaba don ha thaiñ Riwar Mihngi, ka la ïoh ïa ka nam kum ka Shnong ba khuid tam ha ka ka khyndew bah Asia. Hadien katei, kane ka Shnong ka la kiew sted ha ki kam shang pyrthei bad kane ka la pynlah ïa ka Shnong bad ki paidbah nongshongshnong ki la kiew ha ka ïoh ka kot lyngba kane.
Ha kajuh ka por kane ka jingkiew ha ka kam shang pyrthei ka la buh ka jingma ia ka shnong ba ka lah ban jur ka jingtuid ki nongshang pyrthei bad ka lah ban ktah ia ka jingkhuid jingsuba jong ka Shnong.

Leave A Reply

Your email address will not be published.