Khliehriat, Naitung 31: Ki nongïalam bad ki dkhot jong ka Sumer Socio Cultural Sport Education & Entertainment Development Society (SSCSE&EDS) kaba na elaka Sumer, East Jaiñtia Hills District, mynta ka sngi ki la leit ban iakynduh ïa ka khlur iakhun kti lane ka Armwrestler, ka samla Olivia Dkhar, kaba na ka shnong Khahnar bad kaba shong ba sah ha Lad Sutnga, ha kaba ka Society ka la noh jingiarap da ka khung pisa ïa katei ka samla ka ban sa leit sha ka ri Moldova ban mihkhmat na ka ri India ha ka jingialehkai iakhun kti ne armwrestling.
Kum ka jingiarap bad kyrshan lem ïa ka samla Olivia Dkhar ka ban sa leit shabar ka ri ban mihkhmat na ka ri India ha ka jingiakhun kti , u President jong ka SSCSE&EDS, u bah Begin Pasleiñ bad u Secretary u bah Amnesty Salahe, mynta ka sngi ki la aiti ïa ka song pisa sha katei ka samla, ha kajuh ka por ki la ai ki kyntien jingkhublei kitbok kitrwiang, ki jingsneng jingkraw ïa ka samla Olivia Dkhar “Ngi dap da ka jingsngew kmen bad sngew sarong ba kane ka khun samla kaba na ka thaiñ ka la shah jied ban leit mihkhmat na ka ri India bad kane ka jingiarap jong ngi da ka song pisa ka long kum ka dak ka jingkitbok kitrwiang ïa kane ka samla ba kan nang kiew shaphrang ha ka sap ka phong ba ka don” ong u bah Begin Pasleiñ.
“Ka jingthmu ne ka thong jong ka Society ka long ban kyntiew ïa ki sap ki phong jong ki khun samla jong ka ri khamtam kiba na ka thaiñ elaka Sumer, katba nang iaid ka por la sdang ban paw ki samla kiba na ka thaiñ nongkyndong, kumta na ka liang jong ngi kum ka society ngi ai ka jingkitbok kitrwiang ïa ka samla Olivia Dkhar ba kane ka jingleit shimbynta kan wanrah ïa ka nam jingjop bad kan wanrah ruh ïa ka burom ka shnong ka thaw, ïa ka ri bad jaitbynriew” ong u bah Amnesty Salahe.
Na ka liang ka samla Olivia Dkhar ruh ka la pdiang da ka jingsngew nguh ïa kane ka jingnoh jingiarap ka Society bad pynpaw ruh ba ka ngeit skhem ba kan poi sha ka thong ban wanrah ïa ka nam ka burom ïa ka ri, ia ka jylla bad ïa ka jaitbynriew.
La ïa don ryngkat lang ruh ki dkhot jong ka Sumer Socio Cultural Sport Education & Entertainment Development Society, lem bad kiba ha ïing jong ka samla Olivia Dkhar.
Ka samla Olivia Dkhar, 17 snem kyrta ka la shah jied ban leit mihkhmat ïa ka ri India ha ka jingiakop iakhun kti ne ka Armwrestling kaba yn sa pynlong ha u bnai nailar 2024 ha ri Moldova, ka ri kaba don ha ka dewbah Europe.
Kane ka samla Olivia Dkhar kaba dei ka khun jong i kong Tribina Dkhar bad u kpa u bah Shanbor Pasleiñ, ka dei ka samla kaba la wanrahnam ha kiba bun bha ki rynsan iakhun jong ka bad ka la ioh khur ruh ïa ka nam Champion of Champion ha ka lympung iakhun jong ka ha ka 5th Meghalaya Game ka ba la pynlong ha Tura.
Ki rynsan bapher bapher kiba ka samla Olivia Dkhar ka la iakhun bad wanrah jingjop ki kynthup ka Shillong Arm Fight ba la pynlong ha u Soso Tham Audotouriom Shillong myn ha ka 19 tarik haduh 21 tarik u nohprah 2023, ka 5th Meghalaya Game ba la pynlong ha Tura myn ha ka 15 tarik haduh 20 tarik u kyllalyngkot 2024, ha kane ka lympung ha Tura katei ka samla ka la ioh rah ïa ka nam Champion of Champion, kumjuh ruh ha lympung jong ka 33rd Annual State Level pat ba la pynlong ha ka 5 tarik bad 6 tarik u bnai ïaiong 2024 ba la pynlong ha U Soso Tham Auditorium Shillong ka la ioh ïa ka nam lah duh ha ka jingiakhun bad ki samla (Youth Level) bad ioh rah ruh ha ka kyrdan ba ar ha ka jingiakhun ha ka Women Senior Level bad ka national level pat ka la rung ha ka kyrdan ba ar ha ka jingiakhun ba la pynlong ha Maharashtra da ka Maharashtra Armwrestling Association & Samta Sporting Club Nagpur.
