Nongpoh, Naitung 31: Ka Khasi Student Union Nongpoh Circle mynta ka sngi kala leit ban pynlong ka jingkhynra ïaki kot ki sla jong ki bar jylla kiba leit ban trei bylla ha ka jaka ba tei ïaka Polytechnic haka shnong Nongkhrah.
Ha katei ka jingkhynra naka liang ka seng KSU hapoh ka jingïalam u Samla John Lyngdoh President ka Nongpoh Circle lem bad ki dkhot kila leit ban khynra labour license iaki nongtrei katei ka Polytechnic hadien ba ka seng kala lap bun ngut ki bar jylla ba trei bylla ha katei ka jaka.
Ha katei ka jingleit khynra la shem ba ki la don kumba 15 ngut ki bar jylla kiba ym shym la don ia ki kot ki sla kum ki labour licence, ka epic, police verification ban pyntikna ba kitei ki bar jylla kim don ia ki dak sniew eiei, bad napdeng jong ki don ruh ki bym shym la don ia ki EPIC jong ki lane ki adhaar kumta ka seng ka la phah sangeh ban trei iaki bad phah mih noh na katei ka jaka ia baroh kitei ki bar jylla bad phah leit phai noh sha la ki shnong jong ki kaba long ruh kum ka jingpynkheiñ ïaka Interstate Migrant and Workmen Act 1979.
Haba kren sha ki lad pathai khubor naka liang u Samla John Lyngdoh President ka KSU u la ong ba ka seng KSU ka ju leit ban khynra ïaki jaka ba trei bylla ki bar jylla ha baroh kawei ka ri Khasi bad Jaiñtia kum ka jingpynbor ïaka sorkar India ba ka dei ban ai noh ïaka ILP haka jylla bad kumjuh ruh ïaka sorkar jylla ba ka dei ban pyntreikam ïaka MRSSA 2016 bad ha katei ka jingleit khynra watla ka seng ka maham naka por shaka por ka la lap ba kitei ki bar jylla ba trei bylla ha katei ka jaka kim don ïaki kot ki sla ba biang bad dei halor katei ka nongrim naka liang ka seng kala phah leit phai noh ïaki sha shnong.
Shuh shuh naka liang ka seng ka phah ruh ka kyrwoh kaba shai sha ka baroh ki kontraktor ba kim dei ban wanrah ïaki nongtrei bar jylla khlem da pynbiang shuwa ïaki kot ki sla bad kumjuh ruh ki Rangbah Shnong ba ki dei ban tip ïaka rung ka mih jong ki briew hapoh shnong khamtam kiba nabar jylla.
