Shwa ban leit sha Australia, 2.20 lak aiti u DC sha i Mei-ieid Kmoiñ
Mawkyrwat, ‘Naitung 31: U bah T. Lyngwa, Deputy Commissioner jong ka South West Khasi Hills District mynta ka sngi ka 31 tarik u ‘Naitung, 2024 u la ïoh ban aiti ïa ka song pisa kaba T. 2.20 lak sha ka kong Kmoiñ Wahlang kawei na ki nongmareh thong ka ban sa leit ïa shimbynta ha ka 13th Pan Pacific Masters Games – 2024 ha Gold Coast, Queensland, Australia.
Lah ban kdew ba ïa kane ka mang pisa kaba T. 2.20 lak ba la aiti da u Deputy Commissioner, South West Khasi Hills District la ai da ka tnad ka kam ïalehkai jong ka jylla Meghalaya lyngba ka ophis jong u District Sports Officer, South West Khasi Hills District, Mawkyrwat.
Ha shwa ban aiti ïa ka cheque, na ka liang u bah T. Lyngwa, Deputy Commissioner jong ka South West Khasi Hills District ha ka jingkren jong u u la ai ka jingkitbok kitrwiang na ka bynta jong ka kong Kmoiñ Wahlang ba kan ïoh met ba khoit ba khiah khnang ba kan lah ban pyndep ïa kaei kaba ka thmu. “Kane ka jingïarap da ka song pisa ka long shibynta jong ka jingïasnohkti bad ka kong Kmoiñ ha ka jingpynkhreh jong ka ba kan sa leit hapoh Australia”, ong DC.
U la ong shuh shuh ba ka jingleit ïa shimbynta jong ka kong Kmoiñ Wahlang haduh ha Gold Coast, Queensland, Australia ka long shisha ka burom ym tang ïa ka South West Khasi Hills District hynrei wat ïa ka ri India baroh kawei.
Katba haba kren na ka liang jong ka kong Kmoiñ Wahlang ka la pynpaw ka jingaikhublei ba kyrpang na ka bynta ka tnad ophis jong ka kam ïalehkai lyngba u Deputy Commissioner ha kaba la lah ban noh synñiang pisa na ka bynta ka jingpynkhreh jong ka ban leit ban ïashimbynta ha ka 13th Pan Pacific Masters Games – 2024 ha Gold Coast, Queensland, Australia.
Kumta ka la ai ka jingkyrkhu kyrdoh ïa ki ba U Blei Trai Kynrad na jrong Un ïai don ryngkat lem bad ki ha ki por baroh bad Un btin lynti ruh ïa ha ka jingleit ïashimbynta ha ka jingmareh thong.
Ha kane ka sngi la donlang naduh u bah D. Syngkon, District Sports Officer, South West Khasi Hills District, u bah Benningstar Lyngkhoi lem bad kiwei de ki ophisar sorkar.