Ha kine ki khyndiat snem ba ladep, haba peit bha, la ïohi, ba ka sorkar jylla, ka tieng pleng tang ïa kiba khlaiñ bor bad kam pushe eiei ruh em ïa kiba tlot bad kiba ïaid marwei bad ban pynshisha ïa kane ïohi, ba haba kawei ka longkmie, ka nud ban leit shah thngan ha Secreteriat, ka ïoh jingmynjur ban shna surok, nangta haba u heh seng saiñ pyrthei, u leit shah thngan, u lah ban pynkhih ïa ka bhah kam bhah jam, nangta haba ka KSU, ka pyni bor, ki mih ki marks ïaleh eksamin jong ka MPSC bad haba ki nongtrei SSA, ki ïakhih, ki mih ki komiti bad ki jingïakren, na bynta ki jingdawa jong ki.
Kim dei tang kita, ki don bun kiwei pat, ba kynthup ïa ki nongshet ja sngi, ha kaba ki nangheh tulop, na kaba ki pynlong ïakhih, ki ASHA, kiba shah thngan, ki nonghikai, ki nongtrei 108 bad sa shibun kiwei pat.
Ka phang pat kaba dei ban ïakren hangne, ka long ba lyngba kine ki jingsneng, ka la dei ïa kito kiba trei shipor ha ki ophis sorkar, ba kin sdang noh ban ïa thaw seng bad ynda ki la rung khlieh ïalade, ba ki dei ban pynduh jait ïa kine ki kam thombor bad ki kam shim kabu, kiba jia bha ha ki tnat bapher.
Ka nuksa kaba paw shynna bha, ka dei halor ka jingkhot ïa kitei ki kam kiba shipor bad pynbna ïar ha ki kotkhubor bad ynda peit ïa ka bai siew, ka long ba kin khot ïa ki doktor, ki engineer, ki stad kot, ki stad kheiñ jingkheiñ bad ka tulop, ka dei kaba T.8 haduh T.10 hajar shibnai bad katei kam ïahab satia, tang ïa ka jingsiew kaba dei ïa ki nongbylla lane ki skilled labour, hynrei kitei ki tnat sorkar, kin tyrwa ïa ka dor kaba poh tam, katba ka kyrdan kaba heh tam.
Kane ka jingjia, kam dei shuh, tang ha kawei ka tnat sorkar, hynrei ki la bun bah, kiba kum kine bad kiba la ju tip kum ki, ngi lah ban khot, ha kaba ka jingpynbna, ka dei kaba heh bad kaba ïar, nangta ka jingpynlong ïa ki interview, kaba la ima bad kaba bniah thik pa thik; katba ka jingsiew, kan long hapdeng ka T.10 haduh T.20 hajar bad nangta sa ka jaka trei ruh, ka don shajngai bah bad ynda ïa kheiñ tang ka bai kali ruh kam mih.
Hynrei, haba peit na kine ki jingïa pyni bor kiba ïai jia na ka por sha ka por, kumta ka la dei ïa kine ki nongtrei shipor, kiba jyllei bah bad kiba don ha ki tnat sorkar bapher, ba kin ïalum lang noh bad thaw ïa kawei ka seng bad dei lyngba jong kane ka seng, kin dawa ban kylla long sha ki nongtrei ba pura bad tang shu nud ban ïakhih paidbah, da kaba shong kyllaiñ myngor, hangta ka jingsngewlem bad pynshlur, kan sa mih na ki kynhun bapher bad hangta ka sorkar jylla, kan sa khot ban ïakren bad tang shu la ïakren, la thikna ba ka jingheh tulop, ka la ap lypa.
Ka sorkar jylla, ka la dei ruh ban sangeh noh ïa kane ka jingthung kam shipor, ïa ki briew kiba don ïa ka kyrdan kaba biang kum ki doktor, ki engineer, namar ba kane ka jingleh, ka long pynban, kum ka jingriam ruh ïa ki, ba kin shu trei shi trei shipor bad ynda ki la kut ka rta wad kam jongki, kin sa shah kyndang noh bad kumta kin hap shong khlem kam ha ka jinglong tymmen jong ki.
Haba ka long kumne ka la dei ia ka sorkar jylla ba kan leh lang kumjuh ïa baroh khlem da noh shilliang haba kai kano kano ka jingïarap kaba ki la dawa la ki dei kiba tlot bor ne kiba khlaiñ bor naba kane kan wanrah ka jingkyrtoh kylla ïa ka sorkar bad ki sorkar ki ban sa wan hadien habud ki ban synshar ïa ka jylla.
