Shillong, Nailar 18: Ka Ri-iohlang Dhar ka la kylla long ka kynthei kaba ar ha ka histori kum ka assistant referee jong ka ri India ban shah jied na bynta ka FIFA U-17 Women’s World Cup.
Kane ka lympung mynta u snem kan long ha Dominican Republic kaba ha Caribbean. ïa kane ka jingshah jied jong ka Ri-iohlang la pynthikna lyngba ka thup kyrteng ki 38 ngut ki nongpynïaid ïa ki jingïalehkai lane ki match official ba ka FIFA ka la pynbna ha ka Sngi Thohdieng na bynta kane ka lympung ban sdang naduh 10 tarik u Risaw haduh 3 tarik u Naiwieng.
Haba phai dien, ka Uvena Fernandes ka dei ka assistant referee kynthei ba nyngkong jong ka ri ban ïoh ïa kane ka burom ban khmih bad pynïaid ïa ki jingïalehkai ha ka World Cup, da kaba ïoh bynta ha ka FIFA U-17 Women’s World Cup ha u snem 2016 ha Jordan.
“Ka jingshah jied jong Nga ha ka World Cup ka la long ka burom kaba khraw ïa Nga,” ong ka Ri-iohlang katkum ki kyntien ba ka la pynpaw lyngba ka website jong ka All India Football Federation. “Nga la hap ban trei shitom katkum ka jingkhmihlynti jong ka FIFA. Ngan buh jingkynmaw ruh ba Ngan don hangtei kum ka nongmihkhmat jong ka ri India. Ngan ïaleh katba lah ban rah ïa ka lama India kham shajrong.”
Dang shen mynta u snem, ka Ri-iohlang ka la don bynta kum ka assistant referee ha ka AFC U-17 Women’s Asian Cup 2024 ha Bali, Indonesia, kawei na ki lympung ïalehkai ri ba la paw ba ka ïoh ban trei ha ka jingim jong ka kum ka nongpynïaid jingïalehkai (official).
Nyngkong ka la ïoh jingithuh kum ka assistant referee na ka FIFA ha u snem 2018. “Nga la jam bun ki mawjam naduh katei ka por. Nga la ïoh ban pynïaid bun ki jingïalehkai ri hynrei ka World Cup kan long ka jingïashem kaba kham pher,” la ong ka Ri-iohlang.
Ha kaba ïadei bad kane, na ka liang jong u Chairperson jong ka AIFF referees committee, u K Sankar, u la pynpaw, “Mynta u snem ha ka AFC U-17 Women’s Asian Cup ha Indonesia, ka Ri-iohlang ka la ïoh ban pynïaid kawei ka jingïakhun semifinal bad ruh ka jingïakhun na bynta ka kyrdan ba lai (3rd place play-off). Ka jingïashimbynta jong ka, ka la long kaba bha. Ka jingshah jied jong ka ruh ka long ka burom kaba khraw ïa ka AIFF. Na ka liang jong ka referees committee, Nga kitbok ïa ka World Cup kaba sngewtynnat tam na bynta jong ka.”
U M Satyanarayan-Acting Secretary General ka AIFF, u la ong, “Ka jingpynbna jong ka FIFA ba ka Ri-iohlang ka dei kawei napdeng ki nongpynïaid jingïalehkai ha ka U-17 Women’s World Cup ka long kum ka jingai-sngewbha Independence Day na bynta jong Ngi. Ngi la sdang ban phaikhmat ban kyntiew ïa ki referee. Ban tei ïa ka nongrim, Ngi la thung san ngut ki ophisar pynroi referee ha ki zone. Ka Elite Referees’ Development Programme ruh ka la leh bha na ka bynta ki nongpynïaid jingïalehkai kyrdan kiba don ha khliehduh. Ka jingshah jied jong ka Ri-iohlang kan nang pynshlur ban pynroi ïa ki match official kynthei ha India.”
