Ngin ym leit sha u paidbah da ki jingkular bym lah pynurlong ynda ngi thaw sorkar: Mukul Wasnik
Ka ILP kam dei ka mat ba ngin pynrung ha ka manifesto: Pala
Shillong, K’lyngkot, 14: nongïalam ka Congress uba dei ruh u MP sha ka Rajya Sabha u Mukul B Wasnik ha ka sngi Thohdieng uba la wan sha ka jylla ryngkat kiwei pat ki nongïalam jong ka All India Congress Committee (AICC) ban ïakynduh bad ki nongïalam ka Meghalaya Pradesh Congress Committee (MPCC), ha kaba ïadei bad ka jingpynkhreh ïa ka elekshon, u la ong ba ka party kan ym kular kum kiwei pat ki party ïa kino kino ki mat ha ka Election manifesto kiba yn ym lah ban pynurlong ynda ka party kan thaw sorkar.
“Ngin kular ïa kaei kaba lah ban pynurlong ynda ngi thaw sorkar kum ka jingïohkam ïohjam ki samla, ka pule puthi ka shong shaiñ ki kynthei bad ka jingpynkupbor ïa ki bad kaei kaba ngin kular lyngba ka manifesto kin dei kiba ngin lah ban pynurlong ynda ngi thaw sorkar,” u la ong ha ka jingïakren bad ki lad pathai khubor.
“Lada phi peit ïa kaei kaba kum ka party ngi kular ha ki snem kiba la dep lada dei ha ka jylla ne ha ka elekshon ha ka ri, ngi kular ïa kaei kaba ngi lah ban pynurlong ym ban thok ïa u paidbah da ki jingkular bym lah kynjoh shuh,” u la bynrap.
Haba ïadei bad u kyrtong Myntri Rangbah, u Wasnik u ïathuh ba ki bun bah kyrhai ki nongïalam jong ka party ha ka jylla bad ha ki sngi ban wan baroh sa tip hi kiei ki sienjam kiba kum ka party kin shim.
Haba kylli halor ka jingthmu ka Congress ban pynïakhun da ki kyrtong kiba dang thymmai ha kane ka elekshon bad la hato haduh katto ka party ka kyrmen ba kin jop, u Wasnik u la jubab, “Ngin ym leit sha u paidbah tang lyngba ki kyrtong hynrei ngin leit kum ka party Congress bad ki nongrim kiba ngi la ïeng baroh shi katta bad ki kam kiba ngi la leh bad nagm ïohi ba kan don ka jingdunong lada ngi pynïakhun da ki kyrtong kiba dang thymmai ha ka jylli ka saiñ pyrthei.”
“Kaei kaba ki party ki leh bad kaei kab ki party ki kular ka long kabym ïahap satia bad dei namarkata nga ngeit skhem ba ki paibah kin ym ngat shuh ha ka buit shukor jong kine ki party ba don ha ka sorkar,” u la bynrap.
Haba la kyllila ka party kan pynrung ïa ka ILP ha ka manifesto jong ka, u Bah Vincnet H Pala u la ong ba ka party da kaba shai ka kren ba kan ym pynrung satia ïa ka ILP ha ka manifesto kaba kan sa pynlait shen.