Plie u Myntri Rangbah ïa ka Skulbah ba nyngkong jongka jylla hadien 50 snem

Ampati, K’lyngkot 14 : Khatduh ka Jylla Meghalaya kala dei ban sngewsarong namarba hadien 50 snem ba la ïoh ïa la ka jong ka Jylla, dang mynta ka sngi ka la ïoh bad don la ka jong ka State University ne ka Skukbah la ka jong. ïa kane ka skul bah la plie mynta ka sngi da u Myntri Rangbah u Conrad K Sangma.
Kane ka Skulbah ka Jylla (State University) ka dei ka Captain Williamson Sangma State University (CWSSU). La plie ia ka ha ka jingïalang bala pynlong hapoh ka Campus ha Shnong Balalgre, South West Garo Hills District.
U Myntri Rangbah ka Jylla ula ai burom ïa kane ka State University ba nyngkong eh ka Jylla kaba la ai ha ka kyrteng jong u Myntri Rangbah ka nyngkong eh ka Jylla, u Captain Williamson Sangma, sha ki paidbah ka Jylla ha ka jingdap 50 snem jong ka Jylla.
U Chief Adviser jong u Chief Minister, Thomas A. Sangma, Commissioner & Secretary, Education, B.D.R. Tiwari, Secretary, Education, Ambrose Ch. Marak, Vice-Chancellor CWSSU, R.D. Shira, Tura Municipal Board Chairman, J.D. Sangma, Chairman KVIB, Subir Marak, Registrar, CWSSU, bad ki Khlieh jong ki jaka pule, ki Ophisar ka South West Garo Hills bad ki Nokma lem bad ki paidbah ka thaiñ, kila ïadonlang ban sakhi ïa kane ka jingplie paidbah ïa kane ka skulbah ka Jylla.
Haba ai jingkren, u Myntri Rangbah ula ong “Kane ka skulbah ka dei ka Technical University kaba don tang katto katne ki Courses (lain pule) hynrei namar ki katto katne ki daw bad ki jingtynjuh ba ngi ïakynduh ha kine ki snem bala leit noh bad ban pynthikna ba ka Jylla kan don noh la ka jong ka skulbah, ka Kynhun Myntri kala rai ban pynkylla ïa kane ka Technical University sha ka State University ba pura”.
“Ngi la shim ïa ki sienjam ba donkam baroh bad ka kam ka la ïaid ha kaban pynmih ïa ka Ordinance ka ban sa pynbna paidbah da u Lat ka Jylla” ula ong.
Haba jubab ïa ki jingeh bala pynsngew da u Vice Chancellor ba ïadei bad ka jingduna ki jingtei hapoh ka Univerisity, u Myntri Rangbah ula kubur ba ki jingtei kim pat biang satia. “Ngi donkam ban khmih kumno ban shna ïa ka blueprint bad ka master plan bad pynthikna ba kane ka University kan don ïa baroh ki jingdonkam kiba donkam da ki samla pule bad ba ka University kan treikam ha ka rukom kaba dei. Nga kular ha phi baroh ba kane ka dei kaei kaba ngi plan ban leh” ula ong.
Haba sam jingtip halor ka jingshna pynbha ïa ka campus, u Conrad ula ong “Nalor ki kam barit baria kum ka kynroh kaba la dep mang pisa mynta bad la khmih lynti ruh ban sa sdang pyntrei noh shen, ngi la dep mang pisa ruh ban pynïasoh surok na ka surok bah sha ka campus bad ïa kane ka Building hangne ruh ngi khmih lynti ban sdang pyntrei noh shen. Kumba ai jingmut, ngi la dep sdang ïa ka kam kat kum ka jingïohi jngai, ka plan ba hadien habud ba shano kane ka university kan poi ha ki snem ban wan”.
“Ki dang don bun ki kam ba ngi hap ban leh ban pynthikna ba ngi pynkhlaiñ ïa baroh ki kam bad ban pynlong ïa kane ka university, ka State University lajong kum kawei na kaba biang bad hadien habud, kum ka university kaba biang tam hapoh ka thaiñ” ula bynrap.
Da ka jingdon ïala ka jong ka Univeristy, kane kan ailad ïa ki samla pule ka Jylla ban ïaid lait ïa ka Common University Entrance Test (CUET) bad ailad ruh ïa ki College jong ka Jylla ba kin jied ha ka ban pynïasoh bad la ka jong ka State University ban ïa ka NEHU.