Shillong, Nailur 07: Ka Shillong College ha ka sngi Saitjaiñ ka la sam ïa ki syrnod sha ki khynnah pule kiba la pyndep ha ki jingpule bapher bapher.
Ha kane ka sngi sam syrnod la wan ban long kongsan da u Gavin Mylliemngap u MLA Sohra, u Bah M Kharkrang u Retired IPS u la ong kum u Sumbud kongsan, nangta ka Deputy Commissioner East Khasi Hills, ka Kong R M Kurbah, nangta ka Principal jong ka Shillong College, Dr Mrs E Kharkongor, ki nonghikai bad ki khynnah pule jong ka college.
Ha kaba ïadei bad kane ka jingai syrnot bad haba ai jingkren u Bah Gavin Mylliemngap u la ong ba u ai khublei ïa ka Principal jong ka college kaba la khot ïa u ban long kum u kongsan bad u la ong ba kane ka sngi pynkup burom ban ai syrnod ïa ki khynnah ba la pyndep ha ki jingpule bapher bapher ka dei ka ruh ka sien ba nyngkong duh ban sam syrnod bad ban pynkup burom ïa ki khynnah kane ka college naduh ba seng ïa kane ka college.
“Ngim lah ban poi shakhmat khlem ka jingtrei shitom jong ki nongpynïaid barim bad kiba mynta bad kumjuh ruh ki nonghikai,” ong u MLA ka Sohra.
Na ka liang jong u, u la ai khublei ruh ïa ka Shillong college ba ka la ïohpdiang ha ka kyrdan A+ na ka NAAC ïa baroh kiba la trei shitom ban pynlong ïa ka college ban ïohpdiang ha kane ka kyrdan.
U MLA u la ai khublei kyrpang ïa ki khynnah pule kane ka college kiba la pyndep ïa ka Graduation bad kidei ki batch ba nyngkong ban shah pynkupburom ha ki jingpule bad u ai khublei kyrpang ïa ki khynnah ba wan shakhmat ha ka jingpyndep ïa ka Degree, bad u pyntip ruh ba kane kan dei ka sien ba nyngkong ba kin sah kynmaw ha ka jingim jong ki kum ki khynnah.
Ha kaba pynkut u MLA u ai khublei ïa baroh ki khynnah pule kiba la ïoh syrnod bad kiba la pass ha ki jingpule, bad u la ong ba ka jingim la dei ka lynti ïaid ba la hap ban ïaid shakhmat wat lada shibun ki diengpynkiang bad ki jingeh ki wan dei ban ïaid shakhmat ha ka jingim khnang ban wanrah ïa u soh ba jop.
Katba u Bah M Kharkrang uba long u Symbud Kongsan u la ai ka jingïaroh ïa kane ka jaka pule kiba la long ka jingkyrshan ïa kiba bun ki samla pule bad u la kyntu ruh ïa ki samla pynleit jingmut ha ki jingpule kumba la angnud da ki kmie ki kpa bad ba kan long ka jingmyntoi ïa ka ri bad ka jylla baroh kawei, ym pat ban pynleit jingmut ha ki kam ki bym da long kongsan ha ka jingim. Ha kane ka sngi ki la don haduh 750 ngut tam ki samla pule kiba la shah pynkup burom.
