Shillong, Nailur 07: Ki pulit ka East Khasi Hills district ha ka sngi Thohdieng ki la leit ban khynra kiad ha kiba bun ki dukan ha nongbah Shillong kaba kynthup ïa ka jingdie ia ka kiad pyrsi bad ka kiad phareng ba beaiñ ne die tuh.
Ïa kane ka jingkhynra na ka liang jong ki pulit ki la sdang naduh ka thaiñ Sadar, ka Police Bazar, ka thaiñ Polo bad shaduh Mawblei bad Madanrting.
Ha kane ka jingleit khynra na ka liang ki pulit ki la ïoh ban kurup haduh 70 litre ka kiad IMFL bad kumjuh ki la ïoh ban kurup haduh 100 litre ka kiad pyrsi bad ïa kane la ïathuh da u SP ka East Khasi Hills u Bah Sylvester Nongtnger.
Kumjuh ha kane ka jingkhynra ki la leh tyngeh pyrshah ruh ïa kito ki briew kiba ju pynkhih win bad kiba leh ki kam kiba pyntieng ïa ki briew khnang ban pynthikna ba kan don ka jingshngaiñ ha ki surok na ka bynta ki paidbah, bynrap u SP.
“Ki pulit ka East Khasi Hills ki la kut jingmut ban bteng kane ka jingkhynra ïa ka kiad ba la die beaiñ, ka jingñiah kali hadien ba la buaid bad kiwei pat ki kam beaiñ ban pynthikna ba kan don ka jingïada, ka suk ka saiñ na ka bynta ki nongshong shnong ka nongbah,” ong u SP.
