Shillong, Nailur 07: Kum ka dak ban kyntiew ïa ka pule puthi ha ka jylla, u Myntri Rangbah ka jylla u Conrad K Sangma, u la plie ïa ka academic session jong ka Rongjeng Model Degree College kaba ha East Garo Hills district. U Myntri Rangbah u la pynbna ruh ïa ka jingmang pisa na ka bynta ka Rongjeng Stadium, da ka mang tyngka kaba long T. 9.25 klur kaba la aiti ruh sha u MLA ka Rongjeng, u Jim M Sangma.
Ha ka jingkren u Myntri Rangbah u la ong, “Kane ka college ka long ka jingkyrkhu na U Trai Kynrad najrong. Ha u snem 2013, u (Late) P A Sangma u la dep ban ïohi jngai ïa kane ka jaka pule, hynrei sniewbok ba khlem lah ban pynurlong ha ka samoi treikam jong u. Hynrei hadien ba ka NPP ka la wan ha ka bor, ka sorkar pdeng ka la mang ïa ki 2 tylli ki college, bad mar kumta hi ngi la pynïoh ka jaka na ka bynta kane ka college ha Rongjeng, kaba long kum ka jingpyndep ïa ka jingangnud bad jingphoh sniew u (Late) P A Sangma. Nga sngewbha ruh ban pynbna ba ïa kane ka college yn ai ha ka kyrteng kum ka P A Sangma Rongjeng Model Degree College.”
U la pyntip ba ki jingmang pisa la dep ban buh na ka bynta ki kam ban kyntiew ïa kane ka college, kynthup ka pisa T. 93 lak na ka bynta ka jingpynbiang ïa ka um, T. 16.74 lak na ka bynta ki jingker kynroh, bad T. 86.71 lak na ka bynta ki surok. U la banjur ba ka jingjop ka college ka dei ha ka jingtrei shitom ki samla pule, ki nongtrei bad ki nonghikai. U la kyntu ïa ki ban shim ka jingkitkhlieh ban wanrah ka burom bad ka nam ïa kane ka jaka pule.
Katba u Myntri ka tnat Pule Puthi u Rakkam A Sangma, u la ong ba ha u snem 2013, ba u la synran ïa u (Late) P.A. Sangma sha Holy Faith Higher Secondary School ha Rongjeng, ha kaba u Sangma u la banjur ïa ka jingdonkam ka pule puthi, da kaba ong ba ka jingbha ka pule puthi ki khynnah ka long kaba donkam khnang ba kin kiew. U Sangma u la pynbna ïa ka jingthmu ban shna ïa ka college ha Rongjeng, kaba dei kaba la ïohi jngai bad mynta la ithuh kum ka Model College.
Na ka liang u Myntri ka tnat Pule Puthi u la ai jingmut ban ai kyrteng ïa kane ka college da ka P.A. Sangma Model College kum ka dak ka jingkynmaw ïa u. U la kdew ruh ba ka la don ka jingtyrwa kumba T. 26 klur ban ai kyrteng biang ïa ka National Highway 62 kum ka 217 na Nongal sha Simbari.
Katba ka Hazel D. B. Sangma, MCS, Director of Higher & Technical Education, Government of Meghalaya ha ka jingkren ka la banjur ba kane ka jingjop ka la plie ïa ka lynnong kaba thymmai na ka bynta ka jaitbynriew bad kyrpang na ka bynta ki samla pule kiba thmu ban leit sha ki jingpule kiba shajrong.
Da ki jingtei kiba la biang hapoh ka jylla, ha Rongjeng Model Degree College la wanrah ïa ka Arts stream ha ka snem 2024-2025 academic session, ba kynthup ïa ki 6 tylli ki subject ba hakhmat kum ka English, Khasi, Garo, Political Science, Economics, bad History bad haduh mynta la lah ban pynrung haduh 65 ngut ki khynnah pule.
Ba la mang da ka Ministry of Education, ka sorkar pdeng, hapoh ka Rashtriya Uchchatar Shiksha Abhiyan, 2.0 scheme, ïa ka college la shna ha ka jinglut kaba T. 12 klur da ka funding pattern jong ka 90:10. Ïa ka infrastructure developmental project hapoh kane ka skhim na ka bynta ka model degree college ka kynthup ïa ka main building, boys & girls hostel, bad kiwei ki jingtei kiba long na ka bynta ki paidbah kiba la pyndep.
Kiba don ha kane ka sngi plie ki long u Rakkam A Sangma, u Marcuise N Marak, Myntri ka tnat Public Health Engineering (PHE), Soil & Water Conservation, U Jim M Sangma, MLA, Rongjeng Constituency & Chairman, Forest Development Corporation of Meghalaya Ltd, u Bah HM Shangpliang, Advisor ka sorkar jylla ha ka tnat Pule Puthi, u CP Marak, Retd. IFS& Executive Chairman MBOSE, u Vijay Kumar Mantri, IAS, Commissioner & Secretary, Education Department, Government of Meghalaya, u Ambrose CH Marak, IAS, Secretary Education Department, u Vibhor Aggarwal, IAS, Deputy Commissioner, East Garo Hills. Ki ophisar na kiwei ki tnat, ki Principal, ki nongtrei, ki nonghikai na ki skul bapher bapher bad ki college kiba la donlang.
