Nongstoiñ, Rymphang 7: Ka apot sepsngi bad kaba sngew sangsot kaba la jia ïa ka (L) kong Wansaralin Wanñiang kaba dang armet na ka shnong Tiehsaw ha ka janmiet jong ka 2 tarik mynta u bnai, ha kaba ka la shah pom da ka wait na ka khlieh bad ki bynta ka met ha u lok barim jong ka u Biangkupar Nongsiej na ka shnong Lawse haduh ba kan da khlad ha shen, ka la pynsuhjer bad pynkhihwin ym tang ïa ki paitbah jong ka shnong Tiehsaw bad ka thaiñ Nongstoiñ, hynrei kaba la pynkthang bad pynpait dohnud ïa ka kur ka jait ha kyllleng ka ri Khasi kiba tip ïa katei ka apot sepsngi kaba la jia ïa ka bad I khun ba ka dang pun hapoh ka kpoh.
Mynta ka sngi balang ka 7 tarik Rymphang ki rangbah jong ka kur Wanñiang hadien ba ki la dep ban ïashim bynta lang ha ka jingïaid rally ba la pynlong da ka shnong Tiehsaw bad Mawrusyiar ban pynrem ïa utei u runar, ki la leit ban ïakynduh ïa u bah Bikram D. Marak IPS Supritendent of Police West Khasi Hills ban kyrpad ïa u ba un shimkhia lem ban phah pynshitom ïa u Biangkupar Nongsiej katkum ka aiñ.
Kitei ki rangbah jong ka kur Wanñiang haba ïakren bad u nongthoh khubor hadien ba ki la mih na kamra treikam u SP ki la ong ba na ka liang ki rangbah kur, hadien ba katei ka khun pyrsa kur ka la shah pynïap dusmon ha la u lok ka dap da ka jingsngewsih kthang bad ka jingpait dohnud kaba khraw, namar ba kum kane ka apot kam pat ju jia hapoh ka kur ka jait.
Wat hapdeng jong ka jingsngewsih kthang bad ba ki ummat kim pat rngad, kim banse ban wan ïakynduh ïa u SP u ba dei u heh pulit ba ha khlieh duh jong ka distrik, ba un shimkhia bad un pyn ngat ïa utei u Biangkupar Nongsiej ha ki kyndon pynïap briew kiba eh, khnang ba kiwei kin nym nud shuh ban leh ïa kum kitei ki kam pyntriem kiba pynshong syier ïa ki paitbah bad ka imlang sahlang.
Nalor kata ki la ong ruh ba ka kur Wanñiang kam kwah shuh ba kiba kum kine ki jingjia kin dang wan jia ym tang hapoh ka kur ka jait Wanñiang, hynrei kam dei ban jia shuh la ha kano kano ka kur ka jait haph ka bri u Hynñewtrep hynñiew skum bad ha ka jylla baroh kawei.
Ki la ai khublei ruh ïa ka dorbar shnong Tiehsaw, Mawrusyiar, ki sengbhalang, ki paitbah khamtam eh ïa ki pulit kiba la kloi ban wan kem ïa utei u runar. Ki la kyntu ruh ïa ki paitbah ba lada don kino kino ki jingjia kum kine, kim dei ban shim ïa ka aiñ ha ka kti hynrei ki dei ban pyntip wut wut sha ki bor pulit ba kin leh ïa kaba donkam.
