Shillong, Rymphang 08 : Ka tnad Animal Husbandary & Veterinary ka la dep ban tyrwa ïa ka jingmang kaba haduh 4 klur tyngka na ka bynta ban shna ïa ka Check Health Centre ha Byrnihat kaban talasi bad peit ïa ka koit ka khiah ki jingri bad ki mrad bam doh ha shwa ban pyllait pat sha ki paidbah.
Ïa kane la ïathuh da u Myntri ka tnad Veterinary, Bah AL Hek hadien ka jingkynduh bad ka Synjuk ki Rangbah Shnong Ri Bhoi ban buddien ïa ka jingpyntrei ïa katei ka Centre ha Ri Bhoi District.
Katkum ka jingïathuh da u Myntri, katei ka Centre kan long kum ka jaka peit bniah ïa ka koit ka khiah jong ki jingri kum ki masi, ki blang bad ki syiar kiba wanrah na shabar ha shwa ba yn pyllait sha ki paidbah ban pyndonkam ne shohdoh.
` Shuh shuh u ong ruh ba ha kane ka Health Check Centre kin sa wan ki doktor na ka tnad ban eksamin ïa ka koit ka khiah ïa kitei ki jingri ne kiwei kiwei ki jingri ha shwa ban pyllait sha ki paidbah.
Haba kren bad ki lad pathai khubor u Myntri u la ong, “Ka tnad ka la dep ban phah ïa ka jingtyrwa kaba kot sha ka 4 klur tyngka sha ka tnad Pla Tyngka jong ka sorkar jylla khnang ban ïoh sdang pyntrei noh ïa ka Health Centre.”
Tangba u ong pat ba na ka daw ka jingtyrkhong pisa, ka tnad ka la mang shwa tang 1.15 klur tyngka ban sdang noh ïa ka kam, katba ka tnad Pla Tyngka kam pat mynjur ïa ka jingtyrwa jong ka tnad.
