Ha ïew Mawkyrwat shnong dukan tang para khasi, hynrei ïa ka khuid ka suba ym don ba patiaw

Mawkyrwat, Rymphang 08: Ka long kaei kaei kaba i sait met bad i jaboh ban ïohi ba ki jaka ïew ne harud ha kiar ba ïa jan bad ka ïew kim long kiba i khuid tang namar ka jingbym don ka jingïatreilang na baroh ki liang namar da ka jingïabret pathar ïa ki jaboh jabaiñ ha kylleng ki jaka ym ha ka jaka ba la buh kyrpang ne ka dustbin ka pynlong ka jing-i-lehraiñ.
Ha kawei pat ka liang lah ban ong ba ha kum kane ka juk ba mynta ka dei ka juk ba ki briew ki la shai ymshuh kumba long ha ki por ba la dep lada ïa nujor ha kaba ïa dei bad ka jingnang jingstad khamtam lei lei haba kren ïa ka phang jong ka khuid ka suba ngi lap shibun ki jingkylla ha ki shnong ki thaw bad kumjuh ruh haba phai ha ki jinglehkhuid wat ha ki ïing ki sem ne ha kum ka riam ka beit jong ngi ki briew.
Namarakata, haba phai pat ka ki jaka ba long ïew, ki juh ki briew kiba wan na ki shnong ki thaw kiba la nang la stad, kiba tip ruh wat kumno ban lehkhuid ban nym pyn-i-jaboh bad hynrei kaba i sait met pat ka long ba la lap tyngkreiñ ba ki briew imat ki nang tang ban lehkhuid tang ha ïing ha sem hynrei ha ki jaka ba long ïew wat lada la don lypa ki jaka theh ñuit kim nang ban pyndonkam. Kumta ka long kaei kaei kaba pynleh-raiñ ban shna ïa ki jaka theh ne buh ïa ki jakhlia ba kyrpang lada ym nang ban pyndonkam ïa ki, hynrei la lap pat ba ïa ki jakhlia, ki plastik, ki kot jot, ki bilor bad shibun kiwei kiwei de ki jakhlia lap harud jong ka Ïew Mawkyrwat ka la long shisha kaba i sait met ban peit.
Hato ki jakhlia mano ban wan bret? hato dei ki nongshong dukan ne nongshong ïew lane ki nongshong wai hajan ka ïew Mawkyrwat ne dei ki briew kiba wan ïew kiba leh khlem akor? Hato ka jinglehkhuid tang ha ki tyngkong ïing jong ki, ka wanrah mo ïa ka koid ka khiah ne ïa ka khuid ka suba? Lada ka long kumne kam myntoi ka jinglehkhuid tang ha ki kamra shet ja ne tang ha ki ïing la jong khlem da ñiewkor pat shabar ka ïing ne shabar ki shnong ki thaw.
Ha kawei pat ka liang, haba ïoh sngew shaphang ka jinglong jingman ha ka ïew Mawkyrwat la ju paw shai ba kam don kata ka jingïatreilang kumno ban wanrah ka khuid ka suba, namar bunsien hi la ju kynthoh beit ba dei ka ophis jong u Manager Sankur un peit ïa ka bha ka miat bad ka khuid ka suba jong ka ïew Mawkyrwat. Hynrei haba ka long kumta kaei ka ban jia nangne shakhmat lada kam don shuh ka jingïatreilang, bad lah ban ong ba ka jingjakhlia ha ka ïew Mawkyrwat kan nangjur nangjut.
Namarkata, ka jingkyntu ka long ba ha kaba ïa dei bad ka jingkhuid jingsuba kam da donkam eh ban shu shaniah tang ha uwei ne ar ngut hynrei ka donkam eh ka jingïakitkhlieh lang namar da ka jingïatreilang yn lah ban wanrah ka jingjop ha kano kano ka jingïaleh.