Ngim kwah long Rangbah Shnong, ngi kwah tang ban long dkhot ha ka EC ki Dorbar Shnong : LSK

Shillong, Nailar, 09: Ki nongïalam jong ka Lympung ki Seng Kynthei (LSK) ha ka sngi Balang ki la ïakynduh ïa u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ban pynsngew ha u ïa ka jingkwah jong ka kynhun ba ka por ka la ih bad katkum ka jingtyllun jong ka shalyntem ki por, ki kynthei ruh ki dei ban ïadon bynta lang tang kum ki dkhot jong ka Executive Committee ha ki Dorbar Shnong.
Ha ka jingïakren bad ki lad pathai khubor ka President jong ka Lympung ki Seng Kynthei ka Kong Theilin Phanbuh, ka la ong, “ngi la pynsngew ha u CEM ban leh eiei katba shah ka aiñ namarba kane lehse ka long kaba dang thymmai bad lehse ki don ruh ki Dorbar Shnong kiba la kynthup ïa ki kynthei ha ki Executive Committee jong ka Dorbar Shnong hynrei kiba bun hi mynta ki dang duna.”
Kane ka jingpynsngew jong ka Lympung ki Seng Kynthei ka long ba ka District Council kan pynmih da ka jingbthah sha ki Dorbar Shnong ki bym pat don ïa ki kynthei kum ki Executive Member ba kin pynrung ïa ki hapoh ka EC jong ka Dobar Shnong.
“Ngi sngewdonkam ba kan long ryntih namarba ki kynthei ki kham sngewthuh ïa kino kino ki jingeh, da kaba ïadon lang, ïa pyrkhat lang bad ïarai lang ban wanrah ïa ka jingmyntoi, ka jingbit jingbiang bad ka jingbha hapoh ka shnong ka thaw,” la ong ka Kong Phanbuh.
Haba kylli, ka President jong ka Lympung ki Seng Kynthei ka la ong, “ha,oid ka dei ka dustur naduh hyndai hynthai ba ki Kynthei kim lah ban ïadon bynta ha ka Dorbar hynrei phi hap ban peit pat katkum ka jingïaid jong ka por ba la idonkam ban ïadon bynta lang bad ban ïatreilang namarba ki kam haba ïatreilang hapdeng ki shynrang bad ki kynthei ka wanrah ïa ka jingbha.”
Ïa mynta, ka Lympung Ki Seng Kynthei, ka don 31 tylli ki Unit jong ki Seng Kynthei na ki shnong bapher bapher. Hynrei ki don pat ki shnong ba ki dkhot ki Seng Kynthei kim pat ïoh rung kum ki dkhot jong ki Executive Member jong ki Dorbar Shnong hynrei lait noh tang ha ki katto katne ki Dorbar Shnong.
Ka Adviser jong ka LSK ka Kong P.Lyngdoh, haba bynrap halor kane ka la ong, “ngi la ïohi bun, da ka jingïatreilang jong ki kynthei hapoh ki Dorbar Shnong ka la wanrah jingmyntoi shikatdei eh.”
“Ka jingkwah jong ngi ka long tang ban kren ïa ka bha ka miat jong ki kynthei bad ïa ka imlang ka sahlang bad ngim shym ïakren ba ngi kwah ban long Rangbah Shnong namarba ngi ki kynthei ngi sngewthuh ïa ka bor lajong, ka dor lajong. Ngi kwah tang ban don ha ki Executive Committee jong ki Dorbar Shnong ba ngin ïarai lang, ban ïohi lang bad ban kdew lang khamtam ha kito ki shnong ki bym don ïa ki Kynthei ha ki Executive Committee jong ki Dorbar Shnong,” la bynrap ka Kong Lyngdoh.