Ngim kwah ban wan biang ka Sorkar NPP namar lada wan ka UCC kan shukor kumba ka leh ïa ka CAB : HITO

By Mawphor News Desk On Mar 6, 2023

Shillong, Lber 05: Ka Hynniewtrep Integrated Territorial Organisation (HITO) u Bah Donbok Dkhar u la ong ba ka jingpyrshah ka HITO ban wan biang ka sorkar NPP-BJP ha ryngkat ka jingdonlang kiwei pat ki seng saiñ pyrthei ka dei namar ba ki paidbah ki la dep mad ïa ka jingshukor ka NPP ha u 2019 ha kaba ïadei bad ka CAB kaba baroh ki paidbah nongshnong shnong ka jylla ki pyrshah ha kato ka por hynrei na ka liang ka MP jong ka NPP ka la kyrshan ïa kane ka jingkwah ka sorkar BJP ban wanrah ïa kane ka aiñ.
Ha ka kyrwoh sha ki lad patahi khubor u la ong ba ka jingbym kwah shuh ka HITo ban ïohi ïa ka sorkar ban ïalam da ka NPP-BJP ka dei namar baroh ki paidbah ki lah ban sakhi ïa ka jingshah shukor ka jylla ha ka NPP bad u la ong ruh ba ka HITO kum ka Pressure Group ka kwah ban don beit da ka sorkar kaba ïalam da kiwei pat ki party kiba don budlum ban pyrshah ïa ka jingthmu ka sorkar BJP ban pyntreikam ïa Uniform Civil Code (UCC).
“Lada dei ba ki wan kiwei pat ki party lehse kin nud ban ïeng pyrshah ïa ka jingkwah ka BJP hynrei ngi la sakhi ba ka NPP daleilei kan ym nud namar ha u 2018 ka sorkar jylla ba ïalam da ka NPP ka pyrshah CAB hynrei ha Delhi pat ka Agatha Sangma ka MP jong ka NPP ka ai jingkyrshan ïa ka jingpynlong aiñ ïa ka CAB bad ngi ïohi lupa ba kane ruh kan jia biang ïa ka UCC kaba ka BJP ka ap kmang ban wanrah,” u la ong.
Haba kren halor ka jingdon bynta ka HITO ha ka jingthang ïa ki tyngshop u Bah Shakliar Warjri bad u Bah Methodios Dkhar ki MLA ka HSPDP u la ong ba ka seng hi kam dei ka buit jong ka ban thang tyngshop hynrei ka shu leit ban shim bynta ha ka jingïalang da ka jingmut ban pyrshang ban pynbor ïa kito ki MLA ka HSPDP ban ai jingkyrshan ïa ka jingthmu thaw sorkar bym dei NPP-BJP.
“Ngi sngewkmen shibun ban ïohi ba u President ka HSPDP u Bah KP Panñiang u la kren da kaba shai ba lada kane ka kynhun ka don ïa u nombor ban thaw sorkar u shim ka jingkit khileh ban wanrah ïa ka MLA ka party jong u sha kata ka kynhun,” u la ong.
“Nga ïohi ba ki don ki lad pathai khubor kiba la kynnoh ba ka jingleh kito ki MLA ka HSPDP ka dei ka jingshet kylla jaidbynriew nga kwah ban kylli hato kito ki lad pathai khubor kin kynnoh biang ïa ka UDP bad PDF ba ki leit kyrshan ïa ka sorkar ban ïalam da ka BJP ki nongshet kylla jaidbynriew? Nga kwah ban kren da kaba shai ba ngi kum ka seng ngim dei ma ngi ba ong ïa ki MLA ka HSPDP ba ki dei ki nongshet kylla jaidbynriew hynrei ki katto katne ki lad pathai khubor,” u la bynrap.
U la ong ruh ba ka HITO ha ka jingshisha ka la pyrshang ban pyndep hok la ka kamram ban leit pynshai pynsngewthuh ïa ka jingjied nongthaw aiñ sha assembly.
“Ngim sngew kitram shuh namar ngi la pyndep la ka kamram bad kiba sngewthuh ki la leh la ka kamram nga ngeit hynrei kiba ym sngewthuh ngin lah leh shuh aiu ma ngi,” u la ong.