Shillong, Lber, 05: Ka National People’s Party (NPP) ka la khlaiñ bor shuh shuh hadien ba ka United Democratic Party bad ka People’s Democratic Front ki la ai ka jingkyrshan ban thaw ïa ka Sorkar ba thymmai ha ka jylla da ka jingïoh ïa ka jingbun paidbah kaba kynjoh haduh 45 ngut ki MLA.
Da kane ka jingai jingkyrshan jong kine ki ar tylli ki seng saiñpyrthei, ka kynhun Meghalaya Democratic Alliance -II kan sa ïalam ïa ka Sorkar bad ki paralok jong ka MDA kin sa ïalam biang ha ka sien kaba ar ïa ka sorkar synrop.
Ka NPP kaba don 26 ngut ki MLA ka la ïoh jingkyrshan na ki paralok kiba kynthup ïa ka UDP kaba don 11 ngut ki MLA, PDF 2 ngut, BJP 2 ngut, HSPDP 2 ngut bad arngut ki MLA Independent.
Ha ka shithi ai jingkyrshan ba la aiti sha u National President jong ka National People’s Party u Conrad K Sangma, u President ka UDP u Bah Metbah Lyngdoh u la ong, “nga ai khublei ïa ka lehbha jong ka party jong phi, kaba la ïoh ïa ka jingjop. Ha ka kyrteng jong ka Parliamentary Party jong ka United Democratic Party, la ai jingkyrshan na ka bynta ban thaw ïa ka Sorkar.”
Kumjuh ruh u President ka PDF u Bah Gavin M. Mylliem bad u Working President u Bah Banteidor Lyngdoh ki la pynpaw, “….ka People’s Democratic Front ka kwah ban ai ïa ka shithi jingkyrshan ban thaw ïa ka sorkar ba thymmai khnang ban ïoh ïa ka sorkar kaba skhem, bad ban ïatreilang kawei na ka bynta ka bha ka miat jong ka jylla bad ki paidbah nongshong shnong.”
Kane ka rai ka la wan hadien ba ka jingpyrshang ban thaw ïa ka sorkar kaba khlem ka NPP-BJP kam shym la urlong satia hadien ba ki arngut ki MLA jong ka Hill State People’s Democratic Party (HSPDP) ki la jah rngai na ka jingïalang kaba la long hapdeng ki saw tylli ki seng riewlum ba kynthup ïa ka UDP, VPP, PDF bad HSPDP ba la ïashim bynta lang da ka Congress bad ka All India Trinamool Congress, ban leit ai jingkyrshan sop sop ïa ka NPP.
Ki paidbah kiba dap da ka jingbitar ki la thang ïa ki dur tyngshop jong ki arngut ki MLA ka HSPDP ha Motphran ha ka sngi Saitjaiñ bad dawa ba ki dei ban weng noh mardor ïa ka jingai jingkyrshan ïa ka NPP bad ban ailad beit ïa ka sorkar ban ïalam da ki seng riewlum.
U nongïalam jong ka UDP u bym kwah ban pynpaw kyrteng u la ong, “ngi la rai ban ai jingkyrshan ïa ka NPP ban pynthikna ïa ka jingskhem jong ka Sorkar ha ka jylla.”
“Ïa kane ka rai la shim hadien ba ym don lad shuh da kumwei pat. Phi la ïohi ngi la pyrshang katba lah na ka liang jong ngi ban ïakren bad kiba bun ki seng saiñpyrthei, pynban arngut na ki, ki la pyni ïa ka jinglong ka jong ki. Namarkata, ngim kwah ban jia biang kumba ka long ha u snem 2008 ha kaba ka jylla ka la ïoh ïa ka sorkar ka bym skhem,” u la ong.
Shuh shuh, une u nongïalam ka UDP u la ong ba ka rai kaba la ai da ki paidbah sha ki paralok jong ka kynhun MDA, kata, ka NPP, UDP, PDF, HSPDP, BJP ka la kynjoh sha u nombar uba 45.
“Hynrei lada ngi leit kum ki seng riewlum, ngin don tang 19 ngut bad khlem ka jingkyrshan jong ki seng rithor sa shisien ngin ym lah ban thaw ïa ka Sorkar,” u la bynrap.
Haba pynpaw ba yn sa thaw ïa ka sorkar MDA-II ha ka jylla une u nongïalam ka UDP, u la ong, “ngi dei ban burom rai ka rai jong u paidbah. Ngi la wad bun ki lad ki lynti ban lait na ka NPP hynrei kane kam shym la treikam satia.”
Ïa ka jingbate shuki hapdeng ki paralok ka MDA yn sa shim rai ha ka Lah Sngi u Blei.
