Ka VPP kan ym shet kylla da lei lei ruh ïa ki paidbah kan shong ha Liang Pyrshah : Ardent M. Basaïamoit

Shillong, Lber 05: U President ka Voice of the People Party (VPP) u Bah Ardent M Basaiawmoit ha ka sngi u Blei u la ong ba ka jingpyrshang jong ki seng riewlum bad kiwei pat ki seng saiñ pyrthei bym dei na ka NPP-BJP ka la paw shai ba ka dei tang ka drama kaba kito ki katto katne ki seng riewlum ki la dep plan lupa ban pynbiej ïa u paidbah bad u la ong ba na ka liang ka VPP ka la rai ban shong beit ha ka liang pyrshah ban ong ruh ba ka VPP da leilei kan nym shet kylla ïa u paidbah ka jylla.
“Kato ka jingpyrshang ban ïakren hapdeng ki seng saiñ pyrthei bym dei na ka NPP-BJP ban thaw sorkar ka dei tang ka drama ban pynbiej pynthame namar kine ki seng kiba kam ba ki dei ki seng riewlum ki la dep plan lupa ban ïatreilang namar san snem ki la dep ban ïatreilang,” ong u Bah Ardent ha ka kyrwoh sha ki lad patahi khubor.
“Tang ka sia kaba tah ïa ki shympriah kti jong kine ki party kiba leit kyrshan ïa ka NPP-BJP kim pat rkhiang hynrei ki la shah shet kylla bad ai ba ki paidbah kiba kiba kyrshan ïa kine ki party kin pyrkhat la kane ka jingkyrshan seng riewlum ka don jingmut ne em namar wat hadien ba ki la ïohlad ban ïalam ïa ka sorkar kim shim ïa kata ka bynta,” u la bynrap.
Haba ïadei bad ka jingïakren kaba ka VPP ka don bynta lang ban thaw ïa kane ka sorkar bym don NPP-BJP u Bah Ardent u la ong, “Na ka liang jong ngi ngi buh ïa ki kyndon kiba shai lada ngin thaw sorkar ha kane ka kynhun kaba ngi la pyrshang ïakren hynrei lada kine ki kyndon kiba ngi buh kiwei ki party kim lah ban pdeing ngin ai jingkyrshan na shabar ka sorkar tang ban nym ailad ba ka NPP-BJP kan thaw biang ïa ka sorkar”.
Shuh shuh na ka liang u Bah ardent u la kyntu ïa ki paidbah nongkyrshan jong ka VPP ba kin nym artatien ïa ka party ïoh kan shukor namar ka VPP kan neh skhem haduh kaba kut ban ïeng ha ka nongrim kaba ka la leit sha u paidbah ha shuwa ka elekshon ym kum kiwei pat ki party kiba shim kabu ha ka kyrteng jong ka seng riewlum bad ka jaidbynriew da kaba leit kyrshan pat ïa ka party kaba na shabar ban thaw sorkar.
“Nga kwah ban ong ïa kane ka kyrwoh sha ki nongkyrshan ka VPP ba kim dei ban artaien ïa ngi namar ngi kum ka party ngin ym shukor satia ïa u paidbah u ba la pynjop ïa ngi, nga kyrpad ba phin ai jingkyrshan lem ïa ngi da ka jingduwai namar ngin hap ban ïaid ha kine ki san snem hapdeng ki jingeh kaba bun,” ong u Bah Ardent.
Shuh shuh u la ong ba na ka liang ka VPP ka la rai ban shong beit ha ka liang pyrshah ban pyndep hok ïa la ka kamram wat la ki duna paid ruh, “hynrei tang namar ba ngi duna paid ngin ym randien hynrei ngin nym shah jem ba ka sorkar kan leh kataba ka mon,” u la ong.
Lah ban kdew ba kane ka jingkren jong u Bah Ardent ka long hadien ba kiwei pat ki party seng riewlum ba kynthup ïa ka HSPDP, PDF, UDP kiba leit ban tyrwa ïalade sha ka NPP ban ai jingkyrshan na bynta ban thaw sorkar.